भांगरभूंय | प्रतिनिधी
आयज व्हड प्रमाणांत मतदान जावपाची शक्यताय
फोंडें: फर्मागुडयेर काल (मंगळारा) सकाळीं मतदाना खातीर लागपी साहित्य एकठांय करपा खातीर कर्मचाऱ्यांची गर्दी दिसून आयली. पंचायत वेंचणूक आयज (बुधवारा) जावपाची आशिल्ल्यान फोंडें म्हालांतल्या दरेक मतदान केंद्राचेर अधिकारी सज्ज जाल्यात. बुधवारा व्हड प्रमाणांत मतदान जावपाची शक्यताय मतदार उक्तायतात.
फोंडें म्हालांत 19 पंचायती आनी धारबांदोडें म्हालांत 5 पंचायती मदीं जावपी वेंचणुके खातीर सगली यंत्रणा सज्ज जाल्यात. उमेदवारांचो प्रचार सोमारा सांजवेळा सोंपले उपरांत मतदार बुधवारा मतदान करतले. कितल्याशाच प्रभागांनी चडशे उमेदवार वेंचणूक रिंगणांत देंविल्ल्यान लडत अटीतटीची जातली. बुधवारा मतदान जाले उपरांत शुक्रारा सकाळ सावन फर्मागुडयेर आनी धारबांदोड्यां मतमेजणीक सुरवात जातली.
फोंडें म्हालांत संवेदनशील मतदान केंद्राचेर खर पुलीस बंदोबस्त दवरला. ते खातीर खासा पुलिसांचो पंगड लक्ष दवरपा खातीर सज्ज जाला. पंचायत वेंचणुके खातीर बुधवारा फोंडें आनी धारबांदोडें ह्या म्हालांनी व्हड प्रमाणांत मतदान जावपाची शक्यताय आसली तरी पावसान हजेरी लायत जाल्यार मतदानाचेर परिणाम जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
