फुडली साडेचार वर्सां विरोधकाची भुमिका बरे तरेन सांबाळटलो: सरदेसाय

भांगरभूंय | प्रतिनिधी

मडगांव: मुख्यमंत्री डॉ. प्रमोद सावंत सगल्या पांवड्यार अपेशी थारल्यात. तांकां विरोधकूच नाकात. ते विरोधकांक भियातत. देखून तांणी विरोधी पक्षूच सोंपयलो. केंद्र सरकार जशें विरोधक सोंपयता तशेंच गोंयांत चल्लां. आपूण जो मेरेन विधानसभेंत आसा तो मेरेन फुडलीं साडेचार वर्सां विरोधकाची भुमिका बरे तरेन सांबाळटलों अशें फांतोड्डें मतदारसंघाचे आमदार आनी गोवा फाॅरवर्ड पक्षाचे अध्यक्ष विजय सरदेसाय हांणी पत्रकारां कडेन उलयतना सांगलें.

विरोधी पक्ष फुडारी नासून लेगीत सरकारा आड कशें काम करूं येता हें हांवें फाटले विधानसभा अधिवेशनांत दाखोवन दिलां. विधानसभेंत गोंयच्या लोकांचो आवाज आपूण मांडटलों. लोकांनी भियेवपाची गरज ना. ह्या आमदारांनी बांबोळेच्या खुर्सा मुखार आनी पणजे श्री महालक्ष्मीच्या देवळांत सोपूत घेतिल्लो हाचो उगडास तांणी करून दिलो. पितृपक्ष सुरू आसतना तांणी भारतीय जनता पक्षांत प्रवेश केलो हाका लागून तांकां देवाचोय तेंको आसचो ना अशें सरदेसाय हांणी सांगलें.

काॅंग्रेस पक्षांतल्यान आठ आमदार आपल्या सुवार्था खातीर पक्ष सोडून गेले. ते खातीर तांणी पयशे घेतले असो आरोप विजय सरदेसाय हांणी केलो. लोकांक आतां सरकारी कामां खातीर चड पयशे खर्च करचे पडटले. सरकारांत आनीक भ्रश्टाचार वाडटलो अशें सरदेसाय हांणी सांगलें.