भांगरभूंय | प्रतिनिधी
वेगळो जागो ही भानगड करपाची संद आशिल्ल्याचो आरोप
पणजी, प्रतिनिधी : फिल्म सिटीची चर्चा बरीच वर्सां चालू आसा. सरकारा कडेन सॅझ, नायलॉन 6,6 चो जागो आसतना वेगळ्या जाग्याचो सोद कित्याक, असो प्रस्न विरोधी पक्ष फुडारी युरी आलेमांव हांणी केला. फिल्म सिटी खातीर जाग्याचो सोद ही आनीक एक व्हडली भानगड करपाची संद आसा, असो गंभीर आरोप तांणी केला.
राज्यांत बरींच वर्सा आंतरराष्ट्रीय चित्रपट महोत्सव चलता. तो आतां आंतरराष्ट्रीय फ्राॅड महोत्सव जाला. फिल्म सिटी उबारपाच्या नांवा खाला जमनीची आनीक एक भानगड जावची ना, हाची हमी कोण दितलो? बेकायदा जमीन विक्री तशेंच शेत जमनीच्या रूपांतराचे प्रकार नेटान चालू आसात. फिल्म सिटी खातीर 250 एकर जमनीचे प्रस्ताव मागयल्यात. जमीन सांबाळून दवरपाची गरज आसा. हे फाटभुंयेर सरकारान सॅझ, नायलॉन 6,6 जमनीचो फिल्म सिटी खातीर वापर करपाक कसलीच हरकत ना, अशे आमदार आलेमांव हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
