भांगरभूंय | प्रतिनिधी
म्हापशें, प्रतिनिधी ः म्हापश्यां नगरपालिकेने राष्ट्रीय आनी राज्य म्हामार्गा लागसारा आशिल्ल्या सुमार ४० अनधिकृत जायरात तक्ट्यांची (होर्डिंग्स) वळख पटल्या. तशेंच मुखेल रस्त्याचेरूय पालिकेचे परवानगे बगर तक्टे उबारल्यात. ताका लागून गोवा नगरपालिका कायदो १९६८ चे तरतुदी प्रमाण उलंघनकर्त्यांक कारणां दाखयात नोटीस दिवपाक पालिकेने सुरू केलां.
उच्च न्यायालयाच्या गोंय खंडपीठाच्या निर्देशा प्रमाण म्हापशें पालिकेन पालिका वाठारांतल्या राष्ट्रीय आनी राज्य महामार्ग सोडून मुखेल जिल्हो रस्त्यांची पळोवणी मुख्याधिकारी चंद्रकांत शेटकार हांच्या नेतृत्वाखाला ह्या पंगडान केली.
ह्या पंगडांत पालिका कर्मचारी निलेश लिंगुडकार, रमेश किनळकार आनी हेरांचो आस्पाव आशिल्लो. पंगडान पालिका वाठारांतल्या बेकायदो तक्ट्यांची पळोवणी केली.
पालिकेच्या वरिश्ठ अधिकार्यांनी सांगलें, आमी राष्ट्रीय आनी राज्य म्हामार्ग आनी मुखेल जिल्हो रस्त्या कुशीकच्या तक्ट्यांची पळोवणी केली. संबंदीत तक्टे पालिकेचे परवानगे बगर उबारल्यात. ताका लागून होर्डिंगच्या धनयांक कारणां दाखयात नोटीस धाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
