भांगरभूंय | प्रतिनिधी
पणजी, प्रतिनिधी : इन्टाग्रामाचेर ‘फाइंड मी इफ यू कॅन’ ह्या नावांचे खाते करुन मुस्लिमाच्यो भावना दुखोवपी मुळ उत्तरप्रदेशांतल्या मात सध्या बिठ्ठोणा रावपी एक 20 वर्सांच्या भुरग्याक फोंडें पुलिसांनी अटक केल्या. ताचे कडल्यान मोबायल फोन तशेंच हेर उपकरणां जप्त केल्यात. ह्या दुबाविताक दोन दिसांची पुलीस कोठडी दिल्या. हाचे पयलीं माशेलांतल्या एका 27 वर्सांच्या तरणाट्याक पुलिसांनी धरिल्लो. ताका रिमांड दिला. तो गोंयकार.
फाटल्या 7 – 8 वर्सां सावन सोशल मिडिया वयल्यान एकमेकांच्या धर्मां आड, जातीं आड, विचारसरणीं आड सकयल्या पांवड्याचेर टिका करपाचो प्रकार खूबच वाडला. हालींसराक तर श्रद्धा दुखावतल्यो अशे काॅमेंट घाल्ले वाचूंक मेळटात. भारतीयां मदीं धर्मां वयल्यान फूट घालपाक सोदपी ह्या समाजविद्वाट्यांक धरप सोंपें, मात पुलीस ते नदरेन यत्न करताच अशें ना. खंयच्या मोबायला वयल्यान वा संगणका वयल्यान कमेंट केला, हें ताच्या इंटरनेट एड्रेसा वयल्यान सोदूं येता. पुलिसांनी फाटल्या कांय दिसां सावन मात ह्या प्रकाराचेर बडी मारपाक सुरवात केल्या.
इंस्टाग्रामाचेर ‘फायंड मी इफ यू कॅन’ ह्या खात्या वयल्यान मुस्लिम धर्माचे प्रेशित मुहंमद पैगंबर हांची बदनामी करपी चित्रां, मुसलमान धर्मा विशीं आक्षेपार्ह व्हिडियो आनी फोटो पोस्ट केल्ले. मडगांव, पणजी, म्हापशें आनी हेर सुवातींचेर मुसलमानांनी एकठांय येवन निशेध केल्लो. संबंदीत व्यक्तीक अटक करपा खातीर मडगांव, फोंडें, फातोर्डा आनी हेर पुलीस स्टेशनांनी तांणी कागाळ नोंद केल्ली.
‘फायंड मी इफ यू कॅन’ ही एकूच आयडी काय 01, 02… 09 अश्यो वेगवेगळ्यो आयडी आसात, ताचो सोद पुलीस घेतात. हें कोणें एकल्यान केलां काय हाचे फाटल्यान खंयची संघटना आसा, हाचोय तपास पुलीस करतात. फाटीं बोवाळ जालो तेन्ना अकावंटधारकान तें खातें डिलीट केल्लें. ताची मानसीक स्थिती सारकी नाशिल्ल्यान तो तशें करता, अशेंय ताच्या घरच्यांनी पुलिसांक सांगिल्ल्याचें कळटा. मानसीक तणावा खाला तो अशें करता, जाल्यार तें अमूकच धर्मा आड कित्याक करता, ताचीय खातरजमा पुलीस करतात.
हाचे आदीं शिवाजी महाराजांच्या पुतळ्याची विटंबणा करपाचे प्रकार घडल्यात. एकमेकांच्या धर्मां आड, इतिहासकाळांतल्या मनशां आड आक्षेपार्ह मजकूर सोशल मिडियाचेर घालपाचे प्रकार घडल्यात. गोंय एकचारा खातीर प्रसिद्ध आसा, मात ह्या असल्या प्रकारांक लागून ताका व्हडली वेर वचपाची भिरांत न्हयकारपाक येना.
मुख्यमंत्री प्रमोद सावंत हांणी खंयच्याच धर्मा आड, कोणाचे श्रद्धे आड कमेंट, लिखाण, उलोवप केल्लें आमी सोंसून घेवचे नात, अशें हालींच सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
