भांगरभूंय | प्रतिनिधी
म्हापशें: गोंयचो प्रादेशीक आराखडो गांवांक धरून अस्तित्वांत येवचो. जेणे करून गांवांतल्या अभ्यासू आनी जाणकारांक आराखड्याची खोलायेन म्हायती मेळूंक शकतली अशें मत आमदार मायकल लोबो हांणी उक्तायलें.
पर्रा हांगा पर्रा सर्कल ते नागवा जंक्शन मजगतच्या रस्त्याच्या हॉटमिक्सींग कामाचो शुभारंभ केले उपरांत लोबो उलयताले. ह्या वेळार सरपंच चंदानंद हरमलकार आनी पंचायत मंडळ हाजीर आशिल्लें.
प्रादेशीक आराखडो 2021 क आमी 2012 वर्सा विरोध केल्लो. ताका लागून हो आराखडो पांच वर्सा स्थगीत दवरिल्लो आनी 2017 वर्सा तो अंमलात हाडलो. 2021 चो हो आराखडो सद्या संपुश्टांत आयला. ताका लागून नवो आराखडो अस्तित्वांत हाडटना तो गांवांक धरून आसचो. ताका लागून सर्वसामान्य लोकांक ह्या आराखड्यांतल्यो बारीकसाणी समजूंक शकतल्यो अशें लोबोन म्हणलें.
तशेंच इमारत कायद्यांत दुरुस्ती आनी सुदारणा करपा खातीर आर्किटेक्ट, अभियंतो, आदले नगर नियोजक अशा ह्या क्षेत्राचे ज्ञान आशिल्ल्या लोकांचें सहकार्य घेवंक जाय. तांणी कायद्यांतल्यो चुकी आनी सुदारणा विशीं आपलें लिखीत मत मांडूंक जाय अशेंय लोबोन म्हणलें.
मजगतीं, गोंय हें सर्व समावेशक अशें संवसारीक पर्यटन थळ आसा. उच्च न्यायालयान रातीं उसरां संगिताचेर बंदी घाल्या. पूण बंद घरांतल्या संगिताचेर बंदी घाल्ली ना. खूबशे पर्यटक संगिताच्या कार्यावळींनी आनंद घेवपा खातीर येतात अशें लोबोन म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
