भांगरभूंय | प्रतिनिधी
आमी भुरगेपणांतल्यान मनशाच्या मनांत पर्यावरणाची वृत्ती रुजोवंक सुरवात करची. कारण फाल्यांचो नागरीक पर्यावरण जागृत नागरीक आसपाक जाय. तेन्नाच मनशाकुळाचें जिवीत सुखी जावंक शकता..
प्रदुशणाक लागून जावपी हानीकारक बदल ह्या काळांत आनीकय जाल्यात. आयच्या बुदवंत मनशान आपल्या मुखार प्रदुशणाचें हें संकश्ट निर्माण केलां. प्रदुशणाचो हो धोको कांय प्रमाणांत उणो करूं येता. मर्यादा घालूंक मेळटात, पूण ते खातीर धर्तरेचेर आशिल्ल्या दरेका मनशान जागृत जावंक जाय. ‘झाडां लावचीं, झाडां वाचोवचीं’ ही मोहीम फकत मोहीम न्हय, तीं (झाडां) प्रत्यक्षांत लावचीं आनी वाचोवचीं. पर्यावरणांत चडांत चड झाडां कापनासतना रोवपाचो हेतू आसल्यारूच प्रदुशणाची ही भिरांकूळ समस्या उणी जावंक शकता. संत तुकाराम महाराजान म्हणलां ‘वृक्षवल्ली आम्हा सोयरे वनचरे ..’ झाडां आमकां सावळी, फुलां आनी फळां दिता…
पर्यावरणांत समतोल दवरपा खातीर झाडां रोवप आनी तिगोवन दवरप गरजेचें. हो संवसार रचतना देवान मनीस आनी पर्यावरण हांचे मदीं सोबीत समतोल साध्य केला. सैम आनी मनीस एकामेकांक पूरक आसात. पूण उद्देगीक क्रांती जाली आनी ही सगली संतुळा अडचणींत सांपडली. प्रदुशणाचे वेगवेगळे प्रकार आसात. तातूंत आवाजाचे प्रदुशण, वायु प्रदुशण, उदक प्रदुशण हीं सगळ्यांत गंभीर. प्रदुशणाच्या परिणामाक लागून पर्यावरण दुशीत जाता. वायु प्रदुशणाक लागून जावपी परिणाम चड. मनशाची गती वाडिल्ल्यान वायु प्रदुशण निर्माण जाला. वायु प्रदुशणाक लागून मनशाक स्वास घेवपाक लेगीत त्रास जाता…
मळबांतले दूषित हवेचीं कुपां पावसाच्या ढगांचेर लेगीत जैत मेळयतात. मनशान गिरणी आनी कारखाने सुरू केले. आनी व्हड प्रमाणांत वायु प्रदुशण, उदक प्रदुशण निर्माण जालें. कारखान्यान दूषित उदक न्हंयेंत सोडलें. न्हंयांचें सगळें उदक दूषित जालें. ह्या उदकाच्या प्रदुशणाक लागून मनीस तरेकवार रोग आनी म्हामारीचो बळी पडलो. मनशान उदकाचे अवस्थेंत वा घटकांत हानीकारक बदल घडोवन हाडलें ताका लागून उदक प्रदुशण जाता.
वातावरणांत गरजे भायर, असुविधाजनक, अप्रिय, प्रतिकूल अशा हानीकारक परिणामांक लागून आवाज प्रदुशण निर्माण जालें. मनशान केल्ले वेगवेगळे आविश्कार, स्वता खातीर तयार केल्लीं जायतीं वस्तू, जशीं ध्वनीक्षेपक, दूरचित्रवाणी आदी आवाज प्रदुशण करपाक लागल्यात. सतत व्हड आवाजांक लागून आयकुपाचें दुयेंस जावंक शकता. हाका लागून आवाज प्रदुशणाचो परिणाम मनशाच्या कामगिरीचेर जाता आनी मानसीक ताण निर्माण जाता, जाचो रगतदाबाचेर वायट परिणाम जाता.
गांवगिरो समाज पोट भरपा खातीर शारा कडेन धांवपाक लागलो. हाका लागून शारांतली झोपडपट्टी वाडत गेली आनी प्रदुशणांतय वाड जाली. यांत्रीकिरणाक लागून जावपी जायत्या समस्यां मदीं वातावरणांतलें ओझोन उणें जावपाची समस्या आतां धर्तरेचेर पडल्या. आनी आयज तो मनशाच्या जिविताचेर उठला. ह्या सगळ्या प्रदुशणाक लागून वातावरणाचो समतोल इबाडला आनी तो समतोल तिगोवन दवरपा खातीर प्रदुशणाचेर नियंत्रण दवरपा वांगडाच तें करपी गजालींचें निरिक्षण करचें पडटलें.
प्रदुशणाक आदार करता अशे तरेचे वेवस्थेचेर बंदी घालची. कारण प्रदुशण मनशाक एक भिरांकूळ समस्या जाल्या. ही समस्या पयस करपाची आसल्यार आमी भुरगेपणांतल्यान मनशाच्या मनांत पर्यावरणाची वृत्ती रुजोवंक सुरवात करची. कारण फाल्यांचो नागरीक पर्यावरण जागृत नागरीक आसपाक जाय. तेन्नाच मनशाकुळाचें जिवीत सुखी जावंक शकता..
गौरी भालचंद्र
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
