भांगरभूंय | प्रतिनिधी
पालिका मंडळाचो निर्णय रद्द करतलों
वाळपय, प्रतिनिधी: वाळपय नगरपालिकेच्या मैदानाचें भाडें घेवपाचो निर्णय पालिका मंडळान घेतिल्लो. मात हो निर्णय रद्द करतले. ताका लागून कोणेंच हे विशीं गैरसमज करून घेवपाची गरज ना, अशें थळावे आमदार तशेंच भलायकी मंत्री विश्वजीत राणे हांणी म्हणलें.
वाळपय नगरपालिका मंडळान पालिका मैदानाचेर सर्त आयोजीत करपाक भाडें घेवपाचो निर्णय पालिका मंडळाचे बसकेंत घेतिल्लो. हाका लागून पुराय वाळपयंत बोवाळ निर्माण जाल्लो. दिसाचें ७ हजार जाल्यार रातचें २५ हजार रुपया भाडें घेतले अशें पालिका मंडळान स्पश्ट केल्लें. हे विशीं म्हायती मेळटांच खुबश्या जाणांनी हाचो निशेध केल्लो. मंत्री विश्वजीत राणे हांणी हे विशीं विशेश लक्ष दिवचें आनी हो परवडपा सारको नाशिल्लो निर्णय रद्द करचो अशी मागणी खुबश्या जाणांनी केल्ली.
हे विशीं मंत्री राणे हांणी खरपणान लक्ष दिवन हे विशींचो निर्णय रद्द करतले. हे विशीं कोणेंच चिंता करपाची गरज ना. खेळ जिणेंतलो सामको म्हत्वाचो भाग. ह्या वाठारांतल्या खेळगड्यांक उर्बा दिल्यार ते बरें नांव जोडपाक शकतात. देखून अशे तरेचे निर्णय घेवन ह्या वाठारांतल्या खेळा मळार नांव जोडपी खेळगड्यांक फाटी ओडपाचो निर्णय रद्द जातलो. हे विशीं आपणें पालिका मंडळा कडेन चर्चा केल्या. ताका लागून कोणेंच हाचें राजकारण करपाची गरज ना, अशी प्रतिक्रिया राणे हांणी उक्तायल्या.
वाळपय नगरपालिकेन सुमार दोन कोटी खर्च करून हें मैदान बांदलां. आदलें खेळाचें मैदान सारकें नाशिल्लें. हाका लागून गोंय सरकारान भांगरा महोत्सवा खाला दिल्लो एक कोटी रुपयांचो निधी खर्च करून ह्या मैदानाचेर बरी पिच तयार केल्या. भोंवतणीं आडो घालून जायत्यो सुविधा उपलब्ध केल्यात. मात तयार केल्ली पिच धोक्याची आसा. ताका लागून खेळटना जायत्या समस्यांक तोंड दिवचें पडटा अशी कागाळ खेळगड्यांनी केल्या.
पालिकेचें हें एकूच मैदान. ह्या मैदानाचेर आतां मेरेन जायते खेळगडे तयार जाल्यात. तेन्ना खंयचेय परिस्थितींत हो भाडें घेवपाचो निर्णय रद्द करतले, अशे राणे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
