भांगरभूंय | प्रतिनिधी
येवपी ३ दीस गडगड्या सयत पावसाची शक्यताय
पणजी, प्रतिनिधी: आतां मेरेन आडवेळ्या पावसाचं प्रमाण (१ मार्च उपरांतच्या) फोड्यां वाठारांत सगळ्यांत चड म्हळ्यार ७.९३ इंच (२०१.६ मिमी) इतलें आसा. फोंड्यां उपरांत पोरणें गोंय वाठारांत आतां मेरेन ५.११ इंच (१३० मिमी) आडवेळो पावस पडला. राज्यांत सरासरी ६३.४ मिमी (२.४९ इंच) आडवेळो पावस पडला. येवपी ३ दीस म्हळ्यार १९, २० आनी २१ तारखेक हवामान खात्यान येलो ऍलर्ट जारी केल्ल्यान राज्यांत गडगड्या सयत पावस पडपाचो अदमास हवामान खात्यान उक्तायला.
आयतारा सगळ्या वाठारांत दीसभर दमट हवामान आशिल्लें. फांटले बरेच दीस राज्यांत ह्या ना त्या वाठारांत पावसाच्यो सरी पडत आसा. फाटल्या २४ वरांत सांखळे आनी पोरणें गोंय वाठारांत पावसाच्यो सरी पडल्यो. सांखळे २०.८ मीमी जाल्यार पोरणें गोंय १०.४ मीमी पावसाची नोंद जाल्या. सेगीत पडपी पावसाक लागून उश्णताये सावन थाकाय मेळटा.
मॉन्सून येवचे पयलीं जो पावस पडटा ताची गणती आडवेळ्या पावसा मदीं जाता. फोंड्यां, पोरणें गोंय आनी पणजे वाठारांत आडवेळ्या पावसाचें प्रमाण चड आसा. म्हापशें, पेडणें आनी मडगांव वाठारांत आडवेळ्या पावसाचें प्रमाण सामकें उणें आसा. ३१ मेक मॉन्सून केरळांत पावतलो, असो हवामान खात्याचो अदमास आसा. केरळा उपरांत राज्यांत मॉन्सून पावपाक ३ ते ४ दीस लागता. हाका लागून मॉन्सून ४ ते ५ जून मेरेन राज्यांत पावप शक्य आसा.
आता मेरेनचो आडवेळा पावस (१ मार्च उपरांत)
वाठार : प्रमाण (मिमी)
म्हापशें : ४.४
पेडणें : ५.२
फोंडें : २०१.६
पणजी : १०४.४
पोरणें गोंय : १३०
सांखळे : ५५
वाळपय : ८०
काणकोण : ७८.८
दाबोळे : ७२
मडगांव : ६.३
मुरगांव : ४४.६
केपें : ४५.४
सांगें : २९.३
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
