भांगरभूंय | प्रतिनिधी
भांगरभूंय । प्रतिनिधी
फोंडेंः भारताची दुसरी पी टी उषा म्हणून उदयाक येवपी सावड्डें मतदारसंघांतल्या साडगाळ- किर्लपाल हांगच्या प्रतिमा गांवकार हिचे आत्महत्ये उपरांत तिच्या घरच्यांक तिने मेळयल्ली पदकां पळोवन दीस काडचे पडटाट.कारण तिच्या मरणा उपरांत दिल्ल्या आपल्याच आस्वासनांचो सरकाराक विसर पडला. हेऱ खेळगड्यांच्या कुटूंबाक अशी वागणूक दिवची न्हय, अशें प्रतिमाचो भाव शिवानंद गांवकारान सरकारा कडेन मागलां.
साडगाळ सारक्या गांवगिऱ्या वाठारांत जल्म घेतिल्ल्या प्रतिमा ह्या गरीब घऱाब्यांतल्या चलयेन संवसारीक खेळां मळार येश मेळोवन गोंयचें नांव वयर काडल्लें. ब्रुनय हांगां 2001 वर्सा जाल्ले अॅथलेटिक्स सर्तींत तिणे भारताक भांगरा पदक जिखून दिल्लें. ते उपरांत ताका गोंयची धांवराणी अशें म्हणटाले. मात 9 ऑक्टोबर 2001 दिसा प्रतिमान आत्महत्या करून खेळा मळाक व्हडलो धपको दिल्लो.येसाचे तेंगशेर आसतना ताणे आत्महत्या किद्याक केली हाचें कारण स्पश्ट जावपाक शकलें ना तरी शारीरिक कारणाक लागून ताणे हें टोकाचें पावल घातलें अशे सांगताले. गोंय सरकारान तिच्या घरच्यांक घर बांदून दिवपाचें तशेंच शिक्षण पुराय जातगीर तागेलो भाव शिवानंद हाका सरकारी नोकरी दिवपाचें आस्वासन दिल्लें.
शिवानंद गांवकारान धावी पास जाल्या उपरांत आयटीआय प्रशिक्षण घेतलें आनी सरकारी नोकरे खातीर यत्न केलो. ही नोकरी ताका अजून मेळपाक शकली ना. सरकार आपणेच दिल्लीं आस्वासनां विसरला. फाटल्या 10 वर्सा सावन शिवानंद कोलवा हांगा होमगार्ड म्हणून काम करता. प्रतिमा गेल्या उपरांत तेन्नाच्या सरकारान आमकां आस्वासनां दिल्ली. आतां मेरेन खंयच्याच सरकारान ती पुराय केलीं नात. सरकारान आस्वासनांक पाळो दिवचो हे खातीर पणजे वचून ताची फाटपुरवण करप अर्थीक नदरेन शक्य जायना. सरकारान आमची सामकी निर्शेणी केल्या.
भयण प्रतिमान उणे तेपाचे कारकिर्दींत गोंयां सयत भारताचें नांव वयर काडलें हाचो अभिमान दिसता. प्रतिमा ना तरी ताणे जिखल्ली पदकां आमचे खातीर मोलाची आसात. भांगरा पदक जिखल्या उपरांत रेल्वे म्हामंडळान तिका नोकरेंत घेवपाचें आस्वसन दिल्लें अशें शिवानंदान सांगलें.
कळसय- दाबाळ हांगच्या इमाक्युलेट हायस्कुलांत प्रतिमा गांवकारान 10वे मेरेनचें शिक्षण घेतलें. तेन्नी पीटी शिक्षक फ्रान्सिस फर्नांडीस हाचे प्रशिक्षण ताका मेळ्ळें. ताका लागून तालुको आनी जिल्हो पांवड्यार ताणे जायतीं इनामां मेळयलीं. प्रतिमान गोंयच्या खेळा मळार इतिहास घडयल्लो. गांवगिऱ्या वाठारांतले हे चलयेन संवसारीक खेळां मळार येस मेळयलें. तें जितें आशिल्लें जाल्यार आनीकूय विक्रम करताशिल्लें अशें सध्या सेवा निवृत्त जाल्ल्या फ्रान्सिस फर्नांडीस हाणे सांगलें.
केंद्र सरकारान केल्लो भोवमान
ब्रुनय हांगच्या एथलेटिक्स सर्तींत धांवपाचे सर्तींत भारताक भांगरापदक मेळोवन दिल्या उपरांत प्रतिमा गांवकारान तेन्नाची केंद्रीय खेळां मंत्री उमा भारतीन 5 लाख रुपयांचें इनाम जाहीर केल्लें. तशेंच धांवपांतल्या प्रगत प्रशिक्षणा खातीर ताका बंगळुरूंत धाडपाचें जाहीर केल्लें. त्या वेळार प्रतिमाची दुसरें पी टी उषा अशी वळख तयार जाताली. मात प्रतिमान अकस्मात आत्महत्या केली. ताका जाहीर केल्ली 5 लाखांची रक्कम केंद्र सरकारा कडल्यान अजून मेळ्ळी ना अशें ताच्या घरच्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
