भांगरभूंय | प्रतिनिधी
दिसाळीं, माध्यमांतल्यो तरसादी, ढाली शेणत आसात. तेन्नाच साडेतीन दसकां वयर दिसाळ्यांतले पत्रकारितेंत सारिल्ल्या दिसांची यादी उफेवन वयर येतात. आमच्या तेंपार कागद आनी पेनाक म्हत्व आशिल्लें, आयज स्मार्टफोन, आर्टिफिशल इंटेलिजन्साचो शेक आसा. नाशिल्लें फटीचें वातावरण, भोंवतण तयार करपाची सर्तच लागल्या. ते सर्तींत हे वटेन वचपीय चड आसात. एका जाग्यार बसप आमकांय आवड नाशिल्लें, पूण बसल्यार एकचित्त जावन बरोवप, बरयतना मनांतले उमाळे उक्तावप आनी वाचप्यांक सत सांगप ही कालची पत्रकारिता. तेंपा प्रमाण कुरपणें घालप, बदलय जाय. लोकशायेंतले सगले खांबे ताकतिकेन धांवतना लोकशायेचो चवथो खांबो तरी कसो फाटीं रावतलो? राजकारण, समाजीक बदला प्रमाण पत्रकारिता आनी पत्रकारय धांवपाक लागल्यात. खरें सांगपाच्या बोवाळांत आसतना तांचेर केन्नाय मीठ, मिरसांग लावन फटीचीa खबरय खरी करून छापपाक धाडची पडटा. आदल्या फोटोंनी मेल्ल्यांक जिवें करून दाखोवपाचें आव्हानय आयज फोटोग्राफरां मुखार आसा. फोटोग्राफर खबरांकार जाल्यात, तेय झुजा पावंड्यार वावर करतात, वगत येता तेन्ना झुजाच्या मळार देंवन फोटोग्राफी करची पडल्यार तांच्या मजतीक आयज ड्रोन आसात. कालचें चित्र तेंच आशिल्लें? तेन्ना दिसाळ्यांतल्या पत्रकारांक, फोटोग्राफरांक कितलोसो पगार मेळटालो? स्मार्ट फोनच न्हय मोबायल नाशिल्ल्या लॅण्डलायन फोनाच्या युगांतली साडे तीन दसकां आदींची मुखेल करून प्रादेशीक पत्रकारिता गोंयांत कशी आशिल्ली? कितल्यो अस्तुऱ्यो दिसाळ्यांतले पत्रकारितेंत आशिल्ल्यो? आयज अस्तुरेक मेकळेपणान पत्रकारिता करपाक मेळटा? तांचे प्रस्न सुटावे जाल्यात? हातांत स्मार्टफोन घेवन रेकॉर्ड करतना आनी गरज पडल्यार घरा बसून कार्यावळीच्यो खबरी लॅपटावेल्यान कंपोज करून दिसाळ्यांत दितना पत्रकार भावभयणी खोशी आसात? तांचे कडेन चुको जायनात?
साडे तीन दसकांच न्हय पंदरा वर्सां आदींय गोंयांत पत्रकारां खातीर इनामां नाशिल्लीं, आयज तींय मेळटात, पूण सर्तींत वांटेकार कितले? सर्तींनी वांटो घेनासतना राजकारण, समाजमन, अस्तुरेचे प्रस्न, अर्थकारण, उद्येगीक मळ, बाजार, भोंवतण आनी पत्रकारितेंतलीं हेर तासां हातासपाची संद मेळिल्ले पत्रकार आयजय ह्या संवसारांत आसात. तांणी जिणेंत कितें तरी केलां, समाजा कडेन लागणुकूय दवरल्या आनी ते पासत तांचो जिवनगौरवय जाता. जिवनगौरवाचे धनी आतांच्या पत्रकारांक जावपाक जाय जाल्यार तांणी चलचें, भोंवचें पडटलें. आसा तयारी? पत्रकारिता मुखेल करून खबरांकार जावप म्हणल्यार ग्लॅमर न्हय, अठ्ठेचाळीस वरां जागें रावन वावर करचो पडटा. मल्टीमिडिया युगांत पत्रकार मल्टीटास्कर जाल्यात, तांचे वयली जापसालदारकी वाडल्या, पूण पत्रकारितेच्या मळार देंवपी कितले आसात? तांचे भितर कुशळटाय आसा? गोंयांत प्रादेशीक, दिसाळ्यांतले पत्रकारिते कडेन दुस्वासान पळोवपीय आसात, पगार बरो मेळ्ळो तरी मोल कितलें?
साडे तीन दसकां परस चड वर्सां प्रादेशीक भाशेच्या दिसाळ्यांतल्यान खबरांकार म्हणून फुडें सरतना विंगड विंगड मळांवेल्या व्यक्तीमत्वांक मेळपाची संदय मेळटा. खासदार पी टी उषा, प्रधानमंत्री नरेंद्र मोदी हांच्यो मुलाखती घेवप एके अस्तुरेक कशें शक्य जालें? पेन ते लॅपटॉप मेरेन ती कशी पावली? श्रमीक पत्रकारां खातीर कल्याण येवजण कोणाच्या पालवान जाली? एका मुखेलमंत्र्यान समेस्तां मुखार आपल्याक घडोवपांत एके पत्रकार अस्तुरेचो वांटो आसा अशें कित्याक सांगलें? पत्रकारितेच्या मुखेल प्रवाहांतल्यान निवृत्त जावनय स्तंभलेखक म्हणून खबरांकार तीय एक अस्तुरी भोवमान कित्याक मेळयता?
सगलें विखुरिंल्ल्या पत्रपानांनी मांडपाचो येत्न आसतलो. पत्रपानां? तींय विखुरिल्लीं? एके अस्तुरेची? आडमेळीं येतलींच, पत्रकारितेंतलें काळें, धवें, तांबडें पळयल्या उपरांत शांतीकायेचें पाचवें, निळें सूत सोडयतना कोणाकच दुखोवपाचें मनांत ना पूण चुको जाल्यार वाचपी, पत्रकार वांगडी माफ करतले अशी आस्त बाळगितां.
मायभास कोंकणी जेन्ना राजभास जावपाचीं सपनां केळयतालीं, राजभासेचें झूज चालूं आसलें तेन्ना गोंयांत राजभाशेंतलें पयलें दिसाळें सुरू करपा खातीर म्हालगड्यांनी येवजण बांदली. ढाल, तरसादीक शांतीकायेन, फकांडां करून, म्हारू, भुतां जावन जापो दिवपाचो ध्येयवाद आशिल्लो. तो आयज उरला व्हय? परतून ध्येयवादाचें बीं किल्लत? पेटूलांतल्यान तें ल्हान व्हडां मेरेन पावत? ध्येयवादच न्हय जाल्यार झुजारी पत्रकार लोकमान्य बाळ गंगाधर टिळक हांचीं शेणपी तत्वांय परतून जागोवपाचो वगत आयला. टीवी वेल्यान माळोय जातात. श्रमीक पत्रकारितेचे कुडके कुडके जातना राजकारणी हांसतात, खेळटात, करोडपती जातात. पत्रकारय राजकारणाचे वाटेन वचप अनमननात, तातूंतलो एकादरो फाल्यां प्रधानमंत्रीय कित्याक जावचो न्हय? एक राजकारणी गोंयकार मुख्यमंत्री संरक्षणमंत्री जाले, 2024चे लोकसभा वेंचणुकेंतल्यान गोंय देसाक केंद्रीय वित्तमंत्री दित?
कोणें मांडलें पेन आनी तरसादींचें गणीत? एक पत्रकार राजभास कोंकणी खातीर गोंय विधानसभेंतच न्हय जाल्यार गोंयांक राज्य दर्जो मेळपा खातीर विरोधकां वांगडाय कशे रावले? विखुरिल्ल्या पत्रपानांतल्यान तेंच वाचुया, आयकुया.
(फुडें चलता….)
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
