भांगरभूंय | प्रतिनिधी
भांगरभूंय । प्रतिनिधी
पेडणेः पेडणे तालुक्यांतल्या 1 कोटी 44 लाख 77 हजार चौखण मीटर शेत जमनीच्या विभागांत बदल करून ही जमीन वसणूक विभागांत आस्पावन घेवपा खातीर सरकारान जी प्रक्रिया सुरू केल्या ती फाटीं घेवपा खातीर पेडणेकारान सरकाराक 24 वरांची मुजत दिल्या. सरकारान व्ही विभागणी रद्द केली ना जाल्यार आयतारच्यान रस्यार देंवपाचो निर्णय बिरेस्तारा मांद्रे हांगा जाल्ले लोक जाग्रुताय सभेंत घेतला. आयताराक चोपडें पुला वयली येरादारी आडावपाचें लोकांनी थारायला. विभाग बदल फाटीं घेवपाक आपूण सांगतोलो आनी तांणे आयकलें ना जाल्यार आपूण लोकां वांगडा रस्त्यार येतलों अशें सावंत सरकारांतलो घटक पक्ष आशिल्ल्या मगो पक्षाच्या मांद्रे मतदारसंघाचो आमदार जीत आरोलकार हाणे सांगलां.
पेडणे तालुक्यांतल्या 1 कोटी परस चड चौखण मीटर शेज जमनीच्या विभागांत बदल करून कोणेय केन्ना मागणी केली नास्तना ती वसणूक विभागांत घालपाच्या सरकारी हालचालींक लागून पेडकार सध्या खुबळ्ळ्यांत. फाटल्या मंगळारा पार्से ग्रामसभेंत ह्या विभाग बदलाक लोकांनी खर विरोध केल्लो. बिरेस्तारा मांद्रे पंचायत सभाघरांत बसका घेवन लोकांनी ह्या बदला आड लढ्याचो पवित्रो घेवन सरकाराक शिटकावणी दिल्या.
मुख्यमंत्री डॉ प्रमोद सावंत हाणे आयज (शुक्रार) सकाळीं 11 वरांचेर आपल्याक मेळपाक आपयलां. पेडणेकारांचो जमीन विभाग बदलाक खर विरोध आसा. तेन्ना तो बेगोबेग रद्द करपाची विनवणी आपूण तांकां करतोलों. ताणी जर कानार-मनार घेतलें ना जाल्यार ते रस्त्यार येतले आनी आपूण तांच्या वांगडा आसतोलें हें आपूण मुख्यमंत्र्याक सांगतोलो अशें आमदार आरोलकार हाणे सभेत जाहीर केलें.
लोक जाग्रुताय सभेंत गोवा फॉरवर्डाचो दीपक कळंगुटकार, रिव्होल्युशनरी गोवन्साचो मनोज परब, आदलो आमदार परशुराम कोटकार, जिल्हो पंचायत वांगडी सतीश शेटगांवकार आनी रंगनाथ कलशांवकार, मांद्रेचो सरपंच अमित सावंत, केरीची सरपंच धरती नागोजी, मोरजीचो सरपंच उमेश गडेकार, पार्सेंचो सरपंच अजय कळंगुटकार, आगरवाडा सरपंच अँथनी फर्नांडीस, तुयेची सरपंच सुलक्षा नायक, समाज वावुरपी राजन घाटे, मिशन फॉल लोकलाचे राजन कोरगांवकार, पेडण्याचो आदलो नगराध्यक्ष डॉ वासुदेव देशप्रभू, भास्कर नारुलकार तशेंच वेगवेगळ्या पंचायत मंडळांचे पंच वांगडी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
