पुलाची उंचाय वाडोवपा खातीर माती घाल्ल्यान हुंवार येवपाची शक्यताय

भांगरभूंय | प्रतिनिधी

वेळसांव – पाळे वाठारांतल्या लोकांनी उक्तायली भिरांत

वास्को: वेळसांव पाळे हांगा ल्हान पुलाची उंचाय वाडोवपा खातीर तशेंच थंयचें उदक आडावपा खातीर जी माती घाल्ली ती अजून पूर्णपणान काडूंक नाशिल्ल्यान पावसांत थंय हुंवार येवपाची भिरांत थळाव्यांनी उक्तायली. थंय रेल्वे मार्ग दोट्टीकरणाच्या कामा खातीर जो रस्तो तयार केला, ताका लागून उदकाची वाट आडावतली आनी घरांनी उदक घुसपाची भिरांतूय तांणी उक्तायली.

ह्या प्रकरणांत मुरगांवचे मामलेदार, भौशीक बांदकाम खातें आनी हेर सरकारी खात्याच्या अधिकाऱ्यांनी थंयचे वस्तुस्थितीची पळोवणी केली. तेन्ना थंयची माती अजून पुरायपणान उदकांतल्यान काडूंक नाशिल्ल्याचें दिसून आयिल्ल्याचें समाजीक कार्यकर्ते आर्व्हील दोरादोन सांगलें.

वेळसांवां ल्हान पुलाची उंचाय वाडोवपा खातीर थंयच्या उदकाचो प्रवाह बंद करपा खातीर मातयेचो बंधारो बांदिल्लो. पुलाची उंचाय वाडोवपाचें काम पुराय जाल्ल्यान तातूंतली माती काडपाचें काम सुरू केल्लें. त्या वेळार आमदार आंतोन वास आनी हेर हाजीर आशिल्ले. माती काडिल्ल्यान पावसांत उदकाचो निचरो योग्य रितीन जातलो अशें सांगिल्लें.

मजगतीं, थंयची माती पूर्णपणान काडूंक नाशिल्ल्याची कागाळ केल्ली. ह्या प्रकरणांत विवीध सरकारी खात्याच्या अधिकाऱ्यांनी बुधवारा थंयचे नाले, तळयो, गटारां बी हांची पळोवणी केली. तेन्ना थंयच्या नाल्यांतल्या उदकांत व्हड प्रमाणांत माती आशिल्ल्याचें दिसून आयलें.

दोरोदोन म्हणलें, मातयेचो भराव घालून रस्तो तयार केल्ल्यान रस्त्याची उंचाय अदीक जाली आनी गांव सकयल गेलाे. ह्या वाठारांतल्यान पावसाच्या उदकाचो निचरो जाता. ती वाट आडायिल्ल्यान पावसाच्या दिसांनी आशिकुशीच्या घरांनी उदक घुसपाची भिरांत आसा. ती माती पावसा पयलीं काडपाची गरज आसा. थंयची माती काडिल्ल्याचें कांय जाण सांगतात आनी लोकांची दिशाभूल करतात. लोकांक त्रासांत घालूं नाकात. आमदारान ह्या प्रकरणांत दखल घेवपाची गरज आसा.

ओलंसियो शिमोयस हांणी लेगीत पावसांत उदकाचो निचरो जायनासतना हुंवार येवपाची शक्यताय उक्तायली. रेल्वे विकास निगम कसलीच परवानगी घेनासतना आनी सीआरझॅडाचें उल्लंघन करून कामां करीत आसा असो आरोप तांणी केलो. पावसा पयलीं थंयचीं गटारां, तळयो, नालें बी हातूंत उडयिल्ली माती संबंदितांनी काडपाची गरज तांणी उक्तायली.