भांगरभूंय | प्रतिनिधी
भांगरभूंय । प्रतिनिधी
काणकोणः सोमाराक रातयां नेटाचो वारो आनी गडगड्या सयत पडिल्ल्या पावसाक लागून काणकोण वीज कार्यालयाचें सुमार 14 लाख रुपयांचें लुकसाण जालां. वाऱ्यान लायटीचे शिमिटाचे 11 खांबे मोडले. सरयो तुटल्यो आनी लायटीच्या सामानाचें लुकसाण जालें अशें काणकोणचो वीज अभियंतो गोविंद भट हाणे सांगलें. पाळोळें हांग दोन सुवातांनी 4 गाडयांचेर माड आनी आंब्याचें झाड मोडून पडिल्ल्यान तांचे लाखांचें लुकसाण जालां. घरांचेर आनी शॅक्सांचेर माड पडून लुकसाण जालें. वाऱ्यान काणकोण तालुक्यांत सुमार 40 परस चड लाखांचें लुकसाण जाल्ल्याचो अदमास आसा. रातयां वीज पुरवण बंद पडिल्ल्यान गरमेन लोक हैराण जाले.
पाळोळें, व्होवरें, पाटणें, आगोंद, शिरोटी खोला हांगा लायटीचे खांबे मोडून पडिल्ल्यान ह्या वाठारांतल्या लोकांक सोमाराची रात काळखांत आनी घामाघुम अवस्थेंत काडची पडली. काणकोण वीज कार्यालयांच्या 25 कामगारांनी रातभर काम करून चावडी बाजार, लोलयें, पैंगीण, गांवडोंगरी आनी खोतीगांव हांगा मंगळारा फांतोडेर अडेज ते साडेतीन वरां मजगती वीज पुरवण सुरू केली. घरांचेर झाडां पडिल्ल्यान ती काडपा खातीर काणकोणच्या उजो पालोवपी दलाच्या कार्यालयाक 16 कडल्यान कॉल आयले. सोमारा रातीं कांय झाडां काडलीं जाल्यार कांय कडेन हें काम मंगळारा करचें पडलें.
व्हडा प्रमाणांत लायटीचे खांबे मोडिल्ल्यान तांचे सुवातेर नवे खांबे उबे करून सरयो ओडपा खातीर आनी तीन दीस लागपाक शकतात. सध्या केबल्सांनी पाळोळें, आगोंद, खोला हांगच्या लोकांक वीज पुरवण चल्ल्या अशी म्हायती गोविंद भट हाणे दिली. पाळोळें आनी हेर कडेन माड पडून लुकसाण जाल्ल्याची म्हायती मेळतगीर काणकोणचो आमदार आनी सभापती रमेश तवडकार हाणे थंय वचून पळोवणी केली.
राजबाग हांगा फ्रान्सिस फर्नांडीस हाच्या घराचेर माड पडिल्ल्यान ताचें सुमार 15 हजार रुपयाचें लुकसाण जालें. शिवर्षापोत पाळोळें हांगा सपलेश उमेश धुरी आनी सम्राट धुरी हाच्या चारचाकी गाडयांचेर आंब्याचें झाड पडिल्ल्यान तांचें कांय लाखांचे लुकसाण जालां अशें थळावो नगरसेवक लक्ष्मण पागीन सांगलें.
व्होवरें तें पाळोळें हांगच्या पर्यटन शॅक्सांचेर माड पडिल्ल्यान तांचें लुकसाण जालां अशें नगरसेवक सायमन रेबेलोन सांगलें. पर्यटकांच्या दोन गाडयांचेर माड पडिल्ल्यान तांचेय लुकसाण जालां. मंगळारा उजो पालोवपी दलाच्या जवानांनी गाडयांचेप पडिल्लो माड कापलो. पाळोळें वाठारांत 10 माड मोडून पडले. आडवेळाच्या ह्या पावस- वाऱ्याक लागून काणकोणांत सुमार 40 लाख रुपयांचे लुकसाण जाल्ल्याचो अदमास आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
