भांगरभूंय | प्रतिनिधी
मडगांव पालिकेच्या अधिकाऱ्या कडल्यान प्रतिसाद ना
मडगांव: मडगांव पालिका इमारतीचे फाटले वटेन जंय पार्कींग प्रकल्पाची उबारणी करपाची आसा, थंय सांठोवन दवरिल्ल्या कोयराक आयतारा दनपारां उजो लागपाची घडणूक घडली. मडगांव उजो पालावपी दळाच्या जवानांनी उज्याचेर नियंत्रण मेळयलें. पूण पालिकेच्या खंयच्याच अधिकार्या कडल्यान कॉल करून लेगीत लेगीत प्रतिसाद मेळूंक नाशिल्ल्याची खंत तांणी उलोवन दाखयली.
मडगांव पालिका इमारतीचे फाटले वटेन पोरण्या नुस्त्या मार्केटाचे सुवातेंत पार्कींग प्रकल्प उबारपाचो आसा. हाचे आदीं थंय कोयराचेर प्रक्रिया करपा खातीर बेलींग मशिन लेगीत बसयिल्लें. पूण पार्कींग प्रकल्पा खातीर ही सुवात जीसुडा कडेन दिल्या. हे सुवातेर आशिल्लो कोयर ट्रकांतल्यान भरून सोनसड्यार व्हेल्लो. पूण उपरांत थंय थर्माकोला सयत हेर कोयर तशेंच नाल्लाच्या सोण्णांचो कोयर थंय उडयिल्लो.
पालिकेक आशिकुशीच्या वाठारांतल्या नागरिकांनी कोयर उबारचो अशी मागणी हाचे पयलीं केल्ली. पूण हो कोयर कितलेशेच दीस आसा तसोच आसा. आयतारा दनपारां ह्या कोयराक उजो लागपाची घडणूक दनपारां घडली. मडगांव उजो पालोवपी दळाच्या जवानांनी रोखडीच घडणूक थळार धांव घेतली.
दळाच्या जवानांनी सांगलें की हे सुवातेंत बेकायदो कोयराची सांठवणूक केल्या. आशिकुशीक दुकानां आनी मनशाचो राबितो आशिल्ल्यान कोयराची रास उबारपाची गरज आशिल्ली. ताचे कडेन पालिकेन आडनदर केली. उज्याचेर नियंत्रण दवरपा खातीर कोयर परतो करून उदक मारपा खातीर मशिनाची गरज आशिल्ली. पालिकेच्या अधिकार्यांक कॉल करून लेगीत कोणूच प्रतिसाद दिना. सद्या उज्याचेर नियंत्रण मेळयलां अशी म्हायती उजो पालोवपी दळाच्या जवानांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
