भांगरभूंय | प्रतिनिधी
फोंडें: पार-उसगांवां घातक जंक्शना कुशीक काल (मंगळारा) सांजवेळा 5 वरांच्या सुमाराक मोटारीचो धपको स्कुटरीक बसून स्कुटर चालक आनी फाटल्यान बशिल्ली तरणाटी गंभीर जखमी जाली. जखमींक अदीक उपचारा खातीर बांबोळे गोमॅकाँत दाखल केल्या. फोंडें पुलिसांनी अपघाताचो पंचनामो केला. रातीं उसरां मेरेन जखमींचीं नांवां कळूंक शकलीं नात.
थळाव्यांनी दिल्ले म्हायती प्रमाण जीए 12 बी 5778 क्रमांकाची स्कुटर फोंडें सावन मोल्यां वताली. पार-उसगांवां घातक जंक्शनाचे उजवे वटेन आयिल्ल्या जीए 07 एफ 4344 क्रमांकाचे मोटारीचो धपको स्कुटरीक बसून चालक आनी फाटल्यान बशिल्ली तरणाटी जखमी जाली. जखमींक उपचारा खातीर गोमॅकाँत दाखल केल्यात.
सांजवेळा 5 वरांचेर अपघात घडले उपरांत पुलीस सुमार 7.10 वरांचेर अपघात थळार पावले. ताका लागून थळाव्या लोकांनी निरशेणी उक्तायली. तातूंत मोटार चालकान लेगीत अपघाताची म्हायती पुलिसांक दिवपाचें मनीसपण दाखयलें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
