भांगरभूंय | प्रतिनिधी
मडगांव, प्रतिनिधी ः एसजीपीडीएच्या ठोक नुस्त्याच्या बाजारांत बोटींतल्यान आनी रापणकारांक नुस्तें विकपाक मेळचें आनी ताचेर वेळाचें बंदन आसचें न्हय अशी मागणी नुस्तेकारांनी केल्या. राज्य सरकाराचें दुर्लक्ष जाल्ल्यान बाजारांत बुरशी परिस्थिती निर्माण जाल्या आनी पारंपरीक नुस्तेमारांचे विक्रीचेर बंदी घाल्या. हाचे आड आमदार व्हेंझी व्हिएगसान पारंपरीक नुस्तेकार संघटनांक एकठांय येवपाचें आवाहन केलें.
आमदार व्हिएगासान बाणावले कार्यालयांत नुस्तेकारांची बसका घेतली. त्या वेळार तांणी सांगलें, एसजीपीडीएच्या ठोक नुस्त्याच्या बाजारांत एसजीपीडीए, मडगांव नगरपालिका आनी सरकाराचे दुर्लक्ष जाल्ल्यान अस्वच्छ परिस्थिती पातळ्ळ्या आनी हाचो परिणाम म्हूण उच्च न्यायालयाक हो प्रस्न हातांत घेवन निर्देश दिवचे पडले. पूण ताका लागून थळाव्या पारंपरीक नुस्तेकारांक धा वरां उपरांत थंय नुस्तें विकपाक दियनात. पारंपरीक नुस्तें विक्रेत्यांक एसजीपीडीएच्या ठोक नुस्त्याच्या बाजारांत नुस्तें विकपाक सुवात जाय. तांणी ह्या विशयाचेर एकठांय येवपाची गरज आसा. राज्यभरांतल्या सगल्या नुस्तें विक्रेत्यांनी हे बाबतींत राज्य सरकारा कडेन आवाज काडपाची गरज आसा. एसजीपीडीए आनी नगरपालिका सोपो घेतात ताका लागून तांणीच बाजारपेठेचे नितळसाणे कडेन लक्ष दिवपाची गरज आसा अशेंय तांणी सांगलें.
कांय वर्सां आदीं मडगांवांत पारंपरीक नुस्तें विकताले अशें नुस्तेकार जुझे फर्नांडिस हांणी सांगलें. थंयच्या समस्यांक लागून तें विक्री खातीर फातोर्डा हांगा बाजारांत हाडलें. एसजीपीडीए कडल्यान सोपो सोपो निविदा काडपाची प्रक्रिया चालू आसा, निविदा घेवपी कंत्राटदाराक बाजारपेठेचे नितळसाणेची जापसालदारकी आसपाक जाय. पारंपरीक नुस्तेकारांक बाजारपेठ उपलब्ध करून दिवप ही एकूच मागणी आसा अशेंय तांणी स्पश्ट केलें.
राज्या भायले लोक थर्मोकोल पेटयेंतल्यान बाजारांत नुस्तें विकतात ताचेर पालिके कडल्यान कसलीच कारवाय जायना. पूण ताजें नुस्तें हाडून बाजारांत विकपी थळाव्या पारंपरीक नुस्तें विक्रेत्यांचेर कारवाय केली वता. गुजरात, केरळ, कर्नाटक आदी राज्यांतल्यान नुस्तें विकपाक परवानगी आसा पूण ताजें नुस्तें सांठोवपाचो वेळ आयला. एसजीपीडीएचे अध्यक्ष दाजी साळकार, मडगांवचे आमदार सयत नुस्तेमारी उद्देग मंत्री नीळकंठ हळर्णकार आनी बाणावलीच्या आमदारांनी बसका घेवन हांचेर उपाय काडचे अशी मागणी जुझे फर्नांडिस हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
