भांगरभूंय | प्रतिनिधी
भांगरभूंय । प्रतिनिधी
काणकोणः खोला आनी बार्शें पंचायत वाठारांतल्या 7 लाख चौखण मीटर जमनींतल्या प्रस्तावीत मत्स्यचूर्ण प्रकल्पाक खोला हांगच्या सुमार 300 लोकांनी प्रकल्पाचे सुवातेर बसका घेवन ताका विरोध केलो. हे बसकेक केपेंचो आमदार एल्टन डिकॉस्ताक आपयल्लें. आपूण लोकां वांगडा आसा. लोकांक व्हो प्रकल्प नाका जाल्यार आपलोय ताका विरोध आसतोलो अशें ताणे सांगलें. हे सुवातेर फिल्म सिटी हाडपाची मागणी ताणे केल्या.
न्हंयचें उदक प्रदूशीत करपी, पर्यावरणाक बादीकारण प्रकल्प आमकां नाकात. केपें मतदारसंघातली बेरोजगारी उणी करपी प्रदूशण विरयत प्रकल्पांची आमकां गरज आसा. मत्स्यचूर्ण प्रकल्प हाडून गांवांतलें पर्यावरण आनी पर्यटन कोणाकूय इबाडपाक दिवचे नात अशें एल्टन डिकॉस्ता हाणे स्पश्ट केला.
मत्स्यचूर्ण प्रकल्प उबारल्यार ताचो फटको सुमार पांच हजार लोकांक बसतोलो. खोला पंचायत वाठार आतां पर्यटन क्षेत्र जाल्ल्यान नुस्त्याच्या घाणीन हांगा पर्यटक येवचे नात. ताचो परिणाम सगल्यांच्या वेवसायाचेर जातलो अशें सुनील पागी हाणे सांगलें. मुख्यमंत्री डॉ प्रमोद सावंत आनी पर्यावरण मंत्र्यान खोला वाठारांत असले प्रकल्प हाडचे न्हय असो उलो आदलो पंचायत वांगडी नारायण वेळीप हाणे मारला. बसकेक सरपंच कृष्णा वेळीप, शाणू वेळीप, पंढरी प्रभुदेसाय, प्रज्ञा कामत, अजय पागी, तेजल पागी, कृपेश वेळीप, पायक वेळीप हांका खासा आपयल्लें. कृष्णा वेळीप, भूषण खोलकार, विशू खोलकार, विनय नायक, गौरंग भगत, मनोज पागी आनी गोएश हांणी प्रकल्पाक विरोध करपी भाशणां केलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
