भांगरभूंय | प्रतिनिधी
48 वरां भितर केपें पुलिसांनी केली कारवाय
केपें: पाड्डें-केप्यां अर्जून शर्मा (25, बिहार) ह्या कामगाराचो मोबायलाच्या शुल्लक कारणा वयल्यान खून केल्ल्या प्रकरणांत उत्तर प्रदेशांतलो प्रदीप यादव हाका 48 वरां भितर केपें पुलिसांनी उत्तर प्रदेशांत वचून अटक केली.
दोन दिसां पयलीं पाड्ड्यां एका थळाव्या मनशाक अनवखळी मनशाची कूड दिसून आयली. उपरांत पुलिसांनी घडणूक थळार वचून कुडीचो पंचनामो आनी तपास करून ती कूड बिहारी कामगार अर्जून शर्मा हाची आशिल्ल्याचें स्पश्ट जालें.
हे विशीं केपें पुलिसांनी दिल्ले म्हायती प्रमाण मोबायलाच्या शुल्लक कारणा वयल्यान वाद जाल्ल्यान अर्जून शर्मा हाचो खून प्रदीप यादव हाणें केलो. खून करून दुसरेच दिसा गोंया सावन 2100 किमि. पयस आशिल्ल्या खुशीनगर (उत्तर प्रदेश) हांगा रेल्वे मार्गान प्रदीप यादवान आपल्या मूळ गांवांत धांव मारली.
केपेंचे पुलीस निरिक्षक दीपक पेडणेंकार हांच्या फुडारपणा खाला उपनिरिक्षक शिवराम गांवस आनी हेर पुलिसांनी ताकतिकेन उत्तर प्रदेशांत वचून कासिया बस स्टॅण्डार प्रदीप यादवाक अटक केली. 48 वरां भितर दुबाविताक उत्तर प्रदेशांत वचून अटक करपाक केपें पुलिसांक येस आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
