भांगरभूंय | प्रतिनिधी
तिगांक अटक; एके बायलेचोय आस्पाव
फोंडें: पाजीमळ-शिरोड्यां दिसा उजवाडा घरांत घुसून 9 लाख रुपया मोलाच्यो भांगराच्यो वस्ती आनी रोख 20 हजार रुपया फारायिल्ल्या प्रकरणांत फोंडें पुलिसांनी तिगां जाणांक अटक केल्या. हातूंत एके बायलेचोय आस्पाव आसा. ही घडणूक 9 जून दिसा घडिल्ली. पुलिसांनी अटक केल्ल्यां मदीं गॅबी पावलो फेर्नांडीस (25, आंबे उदक, सांवड्डें) शबनम व्यंकटेश चलवादी (24, नावेली, मूळ-धारवाड) आनी महमद कासीम उर्फ दीपक मनूर शेख (22, चांदर) हांचो आस्पाव आसा.
मेळिल्ले म्हायती प्रमाण रसिका प्रशांत पैंगीणकार हांच्या बंद घरांत 9 जून दिसा सकाळीं 10.30 ते 12.30 वरांच्या सुमाराक अनवळख्यांनी घरांत प्रवेश करून सुमार 180 ग्राम वजनाच्यो भांगराच्यो वस्ती फारायिल्ल्यो. हातूंत बांगड्यो, मुदी आनी हेर वस्तींचो आस्पाव आसा. पुलिसांनी ह्या प्रकरणाची चवकशी सुरू केली तेन्ना त्या दिसा गांवांत वट्ट तीन मनीस मोटार घेवन भोंवत आशिल्ल्याचें स्पश्ट जालें. हातूंत एके बायलेचोय आस्पाव आशिल्लो.
पुलिसांनी अदीक चवकशी केले उपरांत बुधवारा रातीं मडगांवां सावन दुबावितांक चवकशे खातीर ताब्यांत घेतले. त्या वेळार दुबावितांनी गुन्यांवाची कबुली दिले उपरांत तांकां अटक केली.
फोंडें पुलिसांनी अटक केल्ल्या गॅबी पावलो फेर्नांडीस आनी महमद कासीम उर्फ दीपक मनूर शेख हांचे आड हेर पुलीस स्टेशनांनी खूबशे गुन्यांव नोंद आसात. फोंडें पुलीस स्टेशनाचे उपअधिक्षक आशीश शिरोडकार हांच्या मार्गदर्शना खाला तुषार लोटलीकार, उपनिरिक्षक रश्मी भाईडकार, आदित्य नायक गांवकार, हवालदार केदार जल्मी, कॉन्स्टेबल अमेय गोसावी आनी आदित्य नायक हांणी कारवायेंत वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
