भांगरभूंय | प्रतिनिधी
पणजी, प्रतिनिधी : पर्वरे चोगम रोडाचेर ‘नियाज’ ह्या रॅस्टोरंटाक बार्देस उपजिल्होधिकार्यांनी कुलूप घाल्लें तरीय तांणी हो वेवसाय चालूच दवरिल्ल्याचो आरोप एका याचिकादारान केलो. हे विशीं याचिकादार मुंबय उच्च न्यायालयाच्या गोंय खंडपिठांत गेला. परवानो नासतना हो वेवसाय चालूच आशिल्ल्याचें प्रदूशण नियंत्रण मंडळान न्यायालयांत स्पश्ट केलें. हाची गंभीर दखल घेवन हें रॅस्टोरंट रोखडेंच बंद करपाचो आदेश उच्च न्यायालयान आयज सकाळीं जारी केलो.
पर्वरेच्या ‘नियाज’ रेस्टॉरंटा विशीं रुजारिओ वालादारीस हांणी संबंदीत प्रशासकीय यंत्रणां कडेन कागाळ दाखल केल्ली. हाची दखल घेवन प्रदूशण नियंत्रण मंडळान ह्या पळोवणी केल्ली. उपरांत तांचे कडेन मंडळाचो परवानो नाशिल्ल्याचें स्पश्ट जाले. मागीर मंडळान बार्देशच्या उपजिल्होधिकार्यांक रॅस्टोरंट बंद करपाचो आदेश दिल्लो. उपजिल्हाधिकार्यांनी आदेशा प्रमाण ७ सप्टेंबराक रेस्टॉरंट बंद करून ताका कुलूप घाल्लें. पूण, १५ सप्टेंबराक कुलूप तोडून नियाज रॅस्टोरंट परत सुरू केलें. ही म्हायती मेळटांचे भलायकी खात्यान २२ सप्टेंबराक रेस्टॉरंटाचें उदक आनी लायट बंद उडयल्ली. तरीय ‘नियाज चालूच उरलें. जनरेटर लावन वीज सुरू केली आनी उदकाचीय वेवस्था तांणी केली, हें याचिकादाराच्या वकिलान न्यायालया मुखार मांडलें. याचिकादाराच्या वकिलान मांडिल्ल्या मुद्या विशीं उच्च न्यायालयान प्रदूशण नियंत्रण मंडळाक प्रस्न विचारले.
ह्या वेळार तांकां कसलेच तरेचो परवानो दिवंक नाशिल्ल्याचें मंडळान स्पश्ट केलें. उपरांत न्यायाधीशांनी हें रॅस्टोरंट बंद करपाचो आदेश जारी केलो. तशेंच तांचो डिझेल जनरेटर ताब्यांत घेवपाचो आदेश उपजिल्हाधिकार्यांक दिलो. फाल्यां मेरेन ही कारवाय पुराय करपाचे निर्देशूय दिल्यात.
हे याचिकेंत सुनील संजय देसाय, नियाज रेस्टॉरंटाचे इर्शाद सौदागर आनी बीआर एंटरप्राजचे धनी कमल कोळी हे तीन प्रतिवादी फुडले सुनावणेक हाजीर रावन आपली बाजू मांडपाचे निर्देश दिल्यात. हाची फुडली सुनावणी १८ ऑक्टोबराक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
