भांगरभूंय | प्रतिनिधी
म्हापशें: माडानी पर्रा हांगा हैदराबादच्या पर्यटकाचो 19 हजारांचो मोबायल फोन झोमून व्हरपाच्या प्रकरणांतलो दुबावीत आरोपी शबीर हजरत अली बलूर (23, रा. ओर्डा कांदोळी) हाका साळगांव पुलिसांनी अटक केली.
ही मोबायल चोरयेची घडणूक फाटल्या 11 सप्टेंबर दिसा सकाळीं 9.30 वरांच्या सुमाराक घडिल्ली. कागाळदार बी. एस. वरूण भट (हैदराबाद) हो पर्यटक तरणाटो घडणूक थळार आयिल्लो. रस्त्यान चलत वता आसतना होंडा स्कुटरी वयल्यान आयिल्ल्या दोगां दुचाकी चालक चोरांनी ताचो मोबायल झोमून धांव मारिल्ली. ह्या मोबायलाचें मोल 19 हजार रुपया आसा.
ह्या प्रकरणांत म्हापशें पुलिसांनी अनवळखी चोरां आड भादंसंच्या 356, 379 आनी 34 कलमा खाला गुन्यांव दाखल केल्लो, आनी दुबावितांचो सोद सुरू केल्लो.
मजगतीं, मंगळारा सांजवेळा उसरां साळगांव पुलिसांक दुबावीत आरोपी दुबावीत रितीन भोंवता आसतना सांपडिल्लो. ताका पुलिसांनी ताब्यांत घेतलो तेन्ना होच दुबावीत आशिल्ल्याचें दिसून आयलें.
ते प्रमाण साळगांव पुलिसांनी दुबाविताक भादंसंच्या 412 कलमा खाला अटक केली आनी हे विशींची कल्पना म्हापशें पुलिसांक दिली. दुबाविताचो एक वांगडी फरारी आसा.
ह्या प्रकरणाचो फुडलो तपास म्हापशेंचे सहाय्यक उपनिरिक्षक रिकी फर्नांडीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
