भांगरभूंय | प्रतिनिधी
विजय सरदेसाय हांचे शिटकावणे उपरांत लिफ्ट सुरू
मडगांव: परंपरीक नुस्तेमारांच्या प्रस्नाचेर चर्चा करपा खातीर बुधवारा सांजवेळा एसजीपीडीएचे कचेरेंत बसका दवरिल्ली. आमदार विजय सरदेसाय हांणी लिफ्ट बंद आशिल्ल्याचें पळोवन तिडक उक्तायली. इतले मजगतीं अध्यक्ष कृष्णा साळकार थंय आयले तेन्ना लिफ्ट सुरू करात नाजाल्यार बसकेकूच येना अशी शिटकावणी सरदेसाय हांणी दिली. उपरांत मॅकानिकाक आपोवन लिफ्ट सुरू केली आनी सरदेसाय बसकेक गेले.
एसजीपीडीएची कचेरी आशिल्ले इमारतींत सुमार चार सरकारी कचेऱ्यो आसात. पूण फाटल्या कांय वर्सां सावन हे इमारतींत लायिल्ली लिफ्ट बंद आसा. कांय वेळ एसजीपीडीएचे बसके वेळार ही लिफ्ट सुरू करतात. पूण सरकारी कचेऱ्यांनी कामा निमतान येवपी जाण्टेल्यांकूय तीन चार माळे चडून वचचें पडटा.
हो मुद्दो हाचे पयलीं चर्चेक आयिल्लो. त्या वेळार एसजीपीडीएचे अध्यक्ष कृष्णा साळकार हांणी ह्या इमारतींतल्या हेर कचेऱ्यां कडल्यान लिफ्टीच्या देखभाल दुरुस्तीची कोणूच जापसालदारकी घेना. रोखडीच सगल्या आस्थापनांची बसका घेवन सगल्यांच्या मतान अर्थीक जाबाबदारी वांटून लिफ्ट सुरू करतले अशें सांगिल्लें. पूण अजून मेरेन ही लिफ्ट सुरू जावंक नाशिल्ली.
बुधवारा एसजीपीडीचे बसके खातीर आयिल्ले फातोड्डेंचे आमदार विजय सरदेसाय हांणी लिफ्ट बंद आशिल्ल्याचें सांगतकूच तिडक उक्तायली. चार सरकारी कचेऱ्यो आसून लेगीत ही लिफ्ट बंद कित्याक असो प्रस्न करून लोकांक सोंपणां चडपाक लायत आशिल्ल्यान एसजीपीडीए कडेन ही लिफ्ट सुरू करपाची मागणी केली.
त्याच वेळार एसजीपीडीए अध्यक्ष कृष्णा साळकार बसके खातीर थंय आयले. आमदार सरदेसाय हांणी लिफ्ट सुरू जाली ना जाल्यार आपूण चार माळे चडून बसकेक येना अशी शिटकावणी दिली. उपरांत मॅकानिकाक आपोवन लिफ्ट सुरू केली आनी उपरांत सरदेसाय आनी हे बसके खातीर एसजीपीडीएचे कचेरेंत गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
