पत्रकारितेचे म्हजे गुरू स. लक्ष्मीदास बोरकार

भांगरभूंय | प्रतिनिधी

नवप्रभा दिसाळ्या खातीर दिवचलचो बातमीदार म्हणून 1977 सावन 1987 मेरेन हांवें काम केलें. लक्ष्मीदास बोरकार संपादक आसतना दिवचल जाल्ल्या साहित्यीक मळा वयल्या कार्यावळीचें खासा वृत्तांत बरोवपाक तांणी म्हाका प्रोत्साहन दिलें. म्हाका याद जाता ती दिवचले योगी हरकरे गुरूजी हांची योगाच्या प्रात्यक्षिकां सयत व्याख्यान जाल्ली ते घडणुकेची. बोरकर सरांनी म्हाका बजोवन सांगलें, हरकरे गुरूजीच्या व्याख्यानांचे पुराय शब्दान – शब्दा सयत वृत्तांकन म्हाका जाय. हांवें त्या व्याख्यानांचें रिपोर्टींग बेस बरें केलें म्हणून तांणी म्हजी तोखणाय केली. म्हज्या नांवाचे बायलायनी सयत रिपोर्टींग उजवाडाक हाडलें.
केन्नाय खासा लेख जाय जाल्यार म्हाका ते बरोवपाची संद दितालेच. दुसरी याद जाता ती दिवचले 1980 सालांत जाल्ल्या गोंय राज्य पांवड्या वयल्या 16 व्या साहित्य संमेलनाची. संमेलन समितीचे कार्यकारी अध्यक्ष आसले स. अमृत कांसार. हांव खजिनदार आसलों. महाराष्ट्र परिचय केंद्राचे मुखेल अधिकार प्रभाकर भुसारी, साहित्य सेवक मंडळाचे अध्यक्ष विनायक नायक, शशिकांत नार्वेकार हांच्या सयत दिवचलचे आमचे वांगडी रामनाथ देसाय, रामचंद्र गर्दे, आनंद सावंत, सुरेश फळारी, श्रीराम गोवेकार, पाटणेकर गुरूजी, तशेंच दिवचल रावपी सरकारी मराठी शाळांतले शिक्षक हांच्या पालवान दिवचलचें संमेलन नेटान जालें.
संमेलनाध्यक्ष आसले पंडित महादेवशास्त्री जोशी. स्वागताध्यक्ष म्हणून स. हरिश झांटये आसले. दिवचल शारांतल्या पालिका मैदानाचेर व्हडलो मंडळ, मुखेल दारा लागसार दोन व्हडल्यो दिवल्यो असो थाट. तीन दीस ह्या संमेलनाची कार्यावळ चल्ली. नामनेचे पत्रकार माधवराव गडकरी हे उगतावणाचे मुखेल सोयरे. तीन दीस तरेकवार साहित्यीक चर्चा परिसंवाद, कवी संमेलन तशेंच नाट्य प्रयोग आनीक संगीत गायनाच्यो मैफिली जाल्यो. पंडीत भीमसेन जोशी हांचें गायन हें ह्या संमेलनाचें मुखेल आकर्शण थारलें. पंडित महादेवशास्त्री जोशी हांचे संमेलनाध्यक्षाचे भाशण यादींत उरपा सारकें.
ह्या संमेलनातली दुसरी म्हत्वाची गजाल म्हणल्यार पालिका मैदानाक ‘छत्रपती शिवाजी महाराज मैदान’ अशें नांव घेवपाचो थाराव जालो. पालिकेन ह्या थारावाचेर पालिका मंडळाचे बसकेंत शिक्कामोर्तब केले. आनीक तेन्ना सावन हे मैदान ‘छत्रपती शिवाजी महाराज मैदान’ ह्या नांवान वळखतात. दिवचलची भूंय शिवाजी महाराजाच्या पांय स्पर्शान पवित्र जाल्ली, ताची ही आठवण (उगडास) करपी घडणूक.
नवप्रभांत त्या वेळार कवी नरेंद्र बोडके, पत्रकार दिलीप देशपांडे, संपादकीय विभागांत उपसंपादक म्हणून काम पळयताले. ह्या संमेलनाचे सगळे कार्यावळीचे वृत्तांत व्हडा रुपान उजवाडाक हाडले.
दिवचल तालुक्यांत पंचायत वाठार शारी वाठारापरस चड. गांवगिऱ्या वाठारांतल्या लोकांचे प्रस्न, सोयी सुविधांचो उणाव, अर्दवट आशिल्ल्यो सरकारी येवजण्यो अश्या कितल्याश्याच गजालींचेर उजवाड घालपा नदरेन ‘डिचोलीच्या जीवनावर प्रकाश झोत’ हो वृत्तवजा स्तंभ हांवें बरयलो. संपादक बोरकार हांणी व्हडा उमेदीन म्हाका बरोवपाची संद दिली.
लक्ष्मीदास बोरकर निवृत्त जाल्या उपरांत कांय काळ तुकाराम श्रीधर कोकजे ‘नवप्रभा’चे संपादक आसले. ‘तुकावाणी’ हे सदर नवप्रभांत बरयताले. वर्सा-देड वर्सा उपरांत तांणी ‘नवप्रभा’ सोडली. तेन्ना दिलीप देशपांडे पणजी आकाशवाणी वृत्त विभागांत रुजू जाल्ले. देखून ‘सुरेश वाळवे’ हांचेर कार्यकारी संपादक
म्हणून नवप्रभा दिसाळ्याची जापसालदारकी पडली. थोड्या वर्सांनी वाळवे नवप्रभाचे संपादक जाले.
हांव त्या वेळार आकाशवाणी खातीर दिवचलच्यो बातमीदार म्हणून काम पळयतालों. आकाशवाणी, दै. तरुण भारत, नवप्रभा हांच्या खातीर बातमीदारकी करतना 1978 सावन हांव इश्कोलांत अध्यापक आसलों. 1984 ह्या वर्सा बेळगांवचो ‘तरूण भारत’ गोंयांत आयलों. ह्या दिसाळ्याचे संपादक किरण ठाकूर हांची योगायोगान दिवचले भेट जाली. आकाशवाणीचे दिलीप देशपांडे हांणी ठाकूरजीक म्हजें नांव सुचयल्लें. त्या वेळार गोंयांत गोमंतक आनी नवप्रभा अशी दोनूच मराठी दिसाळी उजवाडाक येताली. ‘तरूण भारत’ हें गोंयांतलें तिसरें मराठी दिसाळें. गोंय आवृत्ती बेळगांवां छापून पेपराचें गोंयांत फांतोडेचेर वितरण जातालें.
हांवें दिवचलचो बातमीदार म्हणून आकाशवाणी, नवप्रभा आनी ‘तरूण भारत’ हांकां बातम्यो धाडटना कसलोच भेदभाव करूंक ना. पूण दोन तीन वर्सांनी कामाचो व्याप वाडलो आनी हेर कांय कारणांक लागून हांवें ‘नवप्रभा’चो दिवचलचो बातमीदार म्हणून काम पळोवपाचें सोडून दिलें.
नवप्रभांत काम करतना संबंद आयिल्ल्या कांय व्यक्तींक विसरप जाव येता, पूण ज्या दिसाळ्यांत म्हजे पत्रकारितेची सुरवात जाली त्या दिसाळ्याक हांव विसरूंक शकना. त्या वेळावयले संपादक लक्ष्मीदास बोरकार, म्हजे स्नेही मित्र स. दिलीप देशपांडे, नरेंद्र बोडके, जयप्रकाश नायक हांणी म्हाका पत्रकार म्हणून नवप्रभा खातीर वावुरतना जो पालव दिलो, तांचे म्हज्या वांगडा जे मैत्रीच्या नात्याचे अनुबंध जुळोवन आयले तांकां म्हज्या काळजांत वेगळो स्वाद हांवें राखून दवरल्या. ताका लागुनूच ‘त्या दिसांचो’ उगडास येताच येता.
म्हज्या वांगडा कांय तेंप सहकारी म्हणून दै. ‘तरूण भारत’- पणजी हांगासर 1989-90च्या दरम्यान वृत्त विभागांत काम करपी परेश प्रभू हे कांय वर्सां उपरांत नवप्रभाचे संपादक जाले तेन्ना म्हाका खूब खोस भोगली. पणजे कार्यालयांत वचून तांकां मेळोवन तांचें अभिनंदन केलें. प्रभूंची कृपा जाली आनी हांवें सुमार देड वर्स ‘गोवा डायरी’ हें सदर ‘नवप्रभा’त बरयलें. फाटी पडिल्ल्या ह्या दिसांतल्यो गजाली, चिमणेन घोंटेर बांदून रावचें तश्यो मनाच्या घोंटेरान वस्तेक आसा.
‘तुमी बरयात न्हय’ अशे संपादक परेश प्रभू नेमस्त, भिडेस्त, मानेस्त शब्दांत म्हाका सांगता तेन्ना त्या दिसांच्या यादींची ‘नव’ प्रभा म्हज्या मनांत उजवाडटा!

रमेश सावयकार
9637748974