भांगरभूंय | प्रतिनिधी
मडगांव, प्रतिनिधी ः घरकान्नीन व्हिडियो कॉलाचेर उलोवपाक न्हयकार दिल्ल्याचे तिडकीन अमर नागेंद्र शर्मा (३२, उत्तरप्रदेश) ह्या तरणाट्यान बाळ्ळे आपले भाड्याचे कुडींत गोळ घेवन आत्महत्या केली. हे प्रकरण कुंकळ्ळे पुलिसांनी असैमीक मरण म्हणून नोंद केला.
अमर हो देड म्हयन्या आदीं कामाक लागून गोंयांत आयिल्लो. बाळ्ळे ताच्या मेवण्याचें सलुन आसा. अमर सध्या थंय काम करतालो. बायलेक आनी दोन भुरग्यांक उत्तर प्रदेशांत सोडून तो गोंयांत आयिल्लो. बुधवारा मध्यान रातीं ताणें आपले घरकान्नीक व्हिडियो कॉल केलो तेन्ना तिणें ताचे कडेन उलोवपाक न्हयकार दिलो. हाका लागून ताका राग आयलो आनी तिडकीन ताणें भाड्याचे कुडींत गोळ घेवन आत्महत्या केली. अमर दार उगडनाशिल्ल्यान घरधनयान पुलिसांक कळयलें. कुंकळ्ळे उजो पालोवपी दळाच्या जवान दार तोडून घरांत भितर गेले तेन्ना अमरान आत्महत्या केल्ल्याचें दिसून आयलें. अमराची कूड पोस्टमार्टमा खातीर दक्षीण गोंय जिल्लो हॉस्पिटलांत दवरल्या.
पुलिसांनी चवकशी केली तेन्ना अमराचे घरकान्नीन व्हिडियो कॉलाचेर उलोवपाक न्हयकार दिल्ल्यान ताका राग आयलो आनी ताणें आत्महत्या केल्ल्याचे मुखार आयलें. कुंकळ्ळे पुलीस निरिक्षक डायगो ग्रॅसिअस हांच्या मार्गदर्शना खाला पुलीस उपनिरिक्षक कविता रावत ह्या प्रकरणांत फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
