भांगरभूंय | प्रतिनिधी
विधानसभेंतले एकामेकां आडचे उमेदवार आतां एकेच माचयेर
मडगांव: भाजपा कडल्यान दक्षीण गोंय लोकसभा वेंचणूक जिखपा खातीर खर यत्न जायत आसात. विधानसभेंत एकामेकां आड वेंचणूक लडिल्ले दिगंबर कामत आनी मनोहर आजगांवकार हांचे उपरांत कुडटरीचे अपक्ष उमेदवार आलेक्स रेजिनाल्ड आनी भाजप उमेदवार अँथनी बार्बोझा हे एकेच माचयेर दिसून आयले. पल्लवी धेंपो हांकां वेंचून हाडपा खातीर हे फुडारी एकठांय आयिल्ल्याचें दिसतात.
भाजपाच्यो दक्षीण गोंयच्यो उमेदवार पल्लवी धेंपो हांच्या प्रचारा खातीर कुडटरी मतदारसंघांतल्या हावसींग बोर्ड वाठारांतले प्रचार सभेक अपक्ष आमदार रेजिनाल्ड हाजीर आशिल्ले. भाजप एसटी फुडारी अँथनी बार्बोझा तशेंच भाजप महिला फुडारी डॉ. स्नेहा भागवत हांचीय माचयेर हाजेरी आशिल्ली. तांणीय उमेदवाराच्या समर्थनार्थ उलोवप करून भाजपाक मतदान करपाचें आवाहन केलें.
आमदार रेजिनाल्ड आनी अँथनी बार्बोझा हांचे मदली इश्टागत उणी जावंक नाशिल्ल्याचें दिसून आयलें. दोन वर्सां पयलीं जेन्ना बार्बोझा हांणी 2022 वर्साचे विधानसभा वेंचणुकेंत चार फावटी कुडटरीचे आमदार आशिल्ले रेजिनाल्ड हांचेर टिका केल्ली. मुख्यमंत्री प्रमोद सावंत हांच्या फुडारपणा खालच्या भाजपा सरकाराक रेजिनाल्ड हांणी तेंको दिवन लेगीत मतदारसंघांतल्या विकासकामांच्या मुद्या वेल्यान कुडटरीतली भाजपा टीम अपक्ष आमदाराचेर टिका करताली.
दक्षीण गोंयचे सुवाते खातीर भाजपान पल्लवी धेंपो हांकां उमेदवारी दिल्ल्यान मतदारांक एकठांय हाडपा खातीर खर यत्न करीत आसात. कुडटरी भाजप मंडळ आीन अपक्ष आमदार भाजप पक्षाच्या उमेदवाराक चडांत चड मतां मेळची हे खातीर एकठांय आयिल्ल्याचें दिसून येता. हाचे पयलींचे लोकसभा वेंचणुकेंत काँग्रेस पक्षाक मोटी आघाडी मेळिल्ली.
भाजपाच्या उमेदवाराक लोकसभा वेंचणुकेंत जिखोवन हाडपा खातीर भाजप सहकार्याची मजत घेता. हाचे पयलीं मडगांवां प्रचारा खातीर दिगंबर कामत हांचे सयत तांचे आड वेंचणूक लडयिल्ले मनोहर आजगांवकार हांणी एकठांय येवन प्रचार केल्लो. भाजप दक्षीण गोंय लोकसभा वेंचणूक जिखपा खातीर सगले वटांनी यत्न करीत आशिल्ल्याचें दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
