भांगरभूंय | प्रतिनिधी
काँग्रेसीन मुखेल वेंचणूक अधिकाऱ्याक सादर केले निवेदन
पणजी, बातमीदार ः काँग्रेसीचे दक्षीण गोंयचे उमेदवार कॅ. विरियातो फर्नांडिस हांच्या संविधाना विशींच्या विधानाचो विपर्यास केल्लो अशें म्हणून प्रधानमंत्री, मुख्यमंत्री, भाजपा प्रदेशाध्यक्ष आनी आनी हेर मंत्री, आमदारां आड कागाळ दाखल करुन तांचेर बेगोबेग कारवाय करपाची मागणी काँग्रेसीन केल्या. हे संबंदी काँग्रेसीचे अध्यक्ष अमित पाटकार आनी हेर कार्यकर्त्यांनी आल्तीन पणजे मुखेल वेंचणूक अधिकाऱ्याक तीन पानांचे लेखी निवेदन सादर केलें.
कॅ. विरियातो फर्नांडिस हे कारगिल झुजाच्या काळांत सेवा दिवपी म्हालगडे जवान अशें अमित पाटकार हांणी कागाळींत म्हणलां. कॅ. फर्नांडिस हांच्या भाशणाचो चुकीचो अर्थ लावन भारताच्या संविधानाचो अनादर केला अशी फटीची म्हायती भाजपा फुडाऱ्यांनी पातळायल्या असो उल्लेख तांणी कागाळींत केला. तशेंच चुकीची म्हायती पातळावपाक प्रधानमंत्री नरेंद्र मोदी हेवूय जापसालदार आसात. प्रधानमंत्री मोदीन छत्तीसगडांतल्या आपल्या भाशणांत कॅ. फर्नांडीस हांच्या उलोवपाचो दुस्वासी अदमास काडलो, जाका लागून आमच्या उमेदवाराचें भाशण भारताच्या संविधानाचो अनादर करपा सारकें आसा असो भारतीयांचो समज जावचो अशें पाटकार हांणी कागाळींत फुडें म्हणलां.
आमी प्रधानमंत्री नरेंद्र मोदी, गोंयचे मुख्यमंत्री डॉ. प्रमोद सावंत, भाजपाचे अध्यक्ष सदानंद शेट तानावडे, मंत्री मॉविन गुदिन्हो, आमदार संकल्प आमोणकार, आमदार दाजी साळकार आनी भाजपाचे प्रवक्ते दामोदर नायक हांचे आड कारवाय करपाची मागणी केल्या अशेंय अमित पाटकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
