भांगरभूंय | प्रतिनिधी
नागपूर, खबरां संस्था ः अमरावतींत 22 एप्रिलाक प्रा. अंबादास आनी ज्योती मोहिते हांचो पूत विराज आनी नितीन आनी सरिता गोमेकर हांची धूव सलोनी हांचो लग्न सुवाळो आगळे वेगळे पद्दतीन मनयलो.
धर्तरेचेर वाडत वचपी प्रदुशण, रानां कापप, संवसारीक उश्णताय वाड संबंदी लोकां मदीं जागृताय करप हो वसुंधरा दीस मनोवपाचो मुखेल हेतू आशिल्ल्यान ह्या लग्नाचें घोशवाक्य ‘करा वखदी वनस्पतींचें संवर्धन, जातलें समृद्ध पर्यावरण’ अशें आशिल्लें.
लग्न सुवाळ्या वेळार 1000 आमंत्रित सोयऱ्यांक खंडू चक्का, कृष्ण फळ (पॅशन फ्रूट), इन्सुलिन वनस्पत, रक्तचंदन, तुती (मलबेरी), अडुळसो, लक्ष्मण फळ, अंतमुल (डम वेल), तुळस, म्हशींग, पुदिना अशा वखदी वनस्पतींचे रोप दिवन वसुंधरा दिसाची परबीं भेटयलीं. विशेश म्हळ्यार दोन वर्सां आदीं प्रा. मोहिते हांचो व्हडलो पूत तुषाराचो लग्न सुवाळो 5 जून दिसा जाल्लो. तेन्ना लेगीत पर्यावरण दीसा निमतान 1000 फुलांचे रोप वांटून सोयऱ्यांक येवकार दिल्लो. वेगवेगळ्या वखदी वनस्पतींचो सांबाळ केल्यार आमचे भलायकेचोय फायदो जातलो आनी पर्यावरणय समृद्ध करपाक मजत जातली, देखून लोकांनी वखदी वनस्पतींची लागवड व्हड प्रमाणांत करची, असो उलो प्रा. अंबादास मोहिते हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
