भांगरभूंय | प्रतिनिधी
मडगांव-हावसिंगबोर्ड चाकू हल्लो प्रकरण
मडगांव: रुमडामळचे पंच वांगडी विनायक वळवयकार हांचेर दोन दिसां पयलीं चाकू हल्लो जाल्लो. परतून हल्लो जावपाची भिरांत तांणी उक्तायिल्ली. हावसिंग बोर्ड वाठारांतलो तणाव निवळिल्लो ना. हे फाटभुंयेर पंच वळवयकार हांकां सशस्त्र पुलीस सुरक्षा दिल्या.
रुमडामळ-दवर्ली पंचायतीचे पंच वांगडी विनायक वळवयकार हांचेर शेनवारा रातीं चाकू हल्लो जालो. ह्या प्रकरणांत आयूब खान (19) हाका अटक केल्या आनी ताका दोन दिसांची पुलीस कोठी दिल्या.
सोमारा पुलीस उपअधिक्षक संतोष देसाय हांचे कडेन जाल्ले बसके वेळार हावसिंग बोर्ड वाठारांतल्यो बेकायदो मदरसा, बेकायदो धंदे बंदची मागणी करीत परतून हल्लो जावपाची भिरांत उक्तायिल्ली. हावसिंग बोर्ड वाठारांत सद्या तणावपूर्ण वातावरण आसा. मुस्लीम भावांचीय बसका जाली आनी दुकानां तोडफोड प्रकरणांत कायद्या प्रमाण कागाळ करपाचें थारायिल्ल्याचें समजता.
चार वर्सां सावन सुरू आशिल्ल्या बेकायदो चलपी मदरशाचो विशय पंच वळवयकार हांणी लावन धरला. हालींच जाल्ले ग्रामसभेंतूय हो विशय आयलो तेन्ना दोनूय गटांत शाब्दीक वाद जाल्लो. तशेंच कांय दिसां पयलीं हावसिंग बोर्ड वाठारांतले हिंदू धर्मियांचें शुभेत्सा फलक, शिवरायांचे होर्डिंग्ज हांचीय अनवळख्यांनी नासधूस केल्ली. हावसिंग बोर्ड वाठारांतल्या बेकायदो मदरशा पसून होर्डिंग्ज पिंजप आनी बेकायदो धंदे हाचेर वळवयकार आवाज काडीत आशिल्ल्यान चाकू हल्लो जाल्ल्याची शक्यताय आसा.
वळवयकार हांणी हावसिंग बोर्ड वाठारांतले बेकायदो सुरू आशिल्लीं सगलीं आस्थापनां बंद करप, बेकायदो बीफ विक्रीक लागून हिंदू धर्मियांक त्रास जाता तो बंद करचो. तशेंच बेकायदो मदरसा सुरू आसून ताचेर कारवाय करपाची मागणी केली. बेकायदो वेवसाय वाडीक लागून वाद तेंगशेक पावत आशिल्ल्यान ताचेर बंदीची मागणी केल्ल्यान हें प्रकरण तणावपूर्ण जालां.
पुलिसांनी हावसिंग बोर्ड वाठारांत पुलीस बंदोबस्त दवरला. वाठारांत शांतताय आसली तरी परतून दोन समाजां मदीं परतून बोवाळ जावचो न्हय हे खातीर पुलीस परिस्थितीचेर लक्ष दवरून आसात. हेच फाटभुंयेर पंच वळवयकार हांचे सुरक्षे खातीर शस्त्रधारी दोन पुलीस तैनात केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
