भांगरभूंय | प्रतिनिधी
मडगांव, प्रतिनिधी ः रोजगारा विशीं आवयन चवकशी केली, तेन्ना नोकरी नाशिल्ल्यान निर्शेल्ल्या तरणाट्यान आवय कडेन झगडीं केलीं. उपरांत तो रागान घरांतल्यान भायर सरलो. तिडकीन तांणे पुलाच्या रेलिंगाक दोरी बांदून आत्महत्या केली, अशी म्हायती पुलिसांनी दिली. ही घडणूक कुंकळ्ळेंतल्या असोळणा- तारीवाडो वाठारांत घडली. ह्या प्रकरणांत पुलिसांनी अनैसर्गिक मरण अशी नोंद केल्या.
मेळिल्ले म्हायती प्रमाण, खुरसाभाट वेळ्ळी रावपी रायसन मेनन (31) नोकरी नाशिल्ल्यान उदास आशिल्लो. दोन दीस आदीं ताचे आवयन नोकरे विशीं विचारले उपरांत तांचे मदीं झगडीं जालीं. उपरांत रायसन रागान स्कुटर घेवन रातच्या वेळार घरांतल्यान भायर सरलो. बरोच वेळ तो घरां येवंक ना म्हणून कुटुंबान ताचो सोद घेवपाक सुरवात केली. असोळणेच्या फुटब्रिजा लागसार रायसनाची स्कुटर मेळ्ळी. पुलाच्या रेलिंगाक गोळ लायिल्ले अवस्थेत रायसन मेळ्ळो. रायसनाची बायल रायसा हिणें हे घडणुकेची म्हायती पुलिसांक दिली. पुलिसांनी थळार वचून तपास केलो. पुलीस निरिक्षक डायगो ग्रॅसिअस हांच्या मार्गदर्शना खाला फुडली चवकशी चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
