भांगरभूंय | प्रतिनिधी
भांगरभूंय । प्रतिनिधी
म्हापशेंः बोडगिणी म्हापशें हांगा बसस्टॅण्डार जाल्ल्या नवीन बीके (32) ह्या नेपाळी तरणाट्याच्या खून प्रकरणांत म्हापशें पुलिसांनी करण महादेव शिंदे (19) ह्या मूळ सांगें मात गिरी हांगा रावपी तरणाट्याक 48 वरां भितर अटक केली. सोऱ्याचे घुंवळेंत भयणी वयल्यान गाळयो सोविल्ल्यान सोऱ्याची बाटली फोडून नवीन बीकेच्या गळ्यांत रोमून आपणे खून केलो अशी कबुली ताणे दिल्या.
खूनीची ही घडणूक फाटल्या शेनवारा 15 एप्रिलाक फातोडेर 3 उपरांत घडल्ली, दनपारां ती उक्ताडार आयली. पुलिसांनी म्हापशें बसस्टॅण्ड तशेंच टॅक्सी स्टॅण्ड वाठारांतल्या सीसीटीव्ही फुटेजाचे मजतीन दुबाविताक अटक केली. घडणुके पयलीं रातयां शिंदे आनी नवीन सोरो पियेत म्हापशें टॅक्सी स्टॅण्डार बशिल्ले. त्या वेळार तांची वळख जाली. उपरांत नव्या बसस्टॅण्डा कुशीकच्या शेतांत ते सोरो पियेवपाक गेले. थंय एकमेकाच्या घरच्यांची म्हायती घेतना सोऱ्याचे घुंवळेंत नवीन हाणे शिंदेक भयणी वयल्यान गाळयो सोंवपाक सुरवात केली. ताचे मदी झगडें जालें आनी शिंदेन सोऱ्या बाटली फोडून नवीनाच्या गळ्यांत रोमली आनी थंयच्यान तो पळून गेलो.
पुलिसांनी सुरवेक दुबावा वयल्यान एके बायले सयत तिग जाणांत ताब्यांत घेवंन चवकशी केली. मात तांचो हात ना अशें स्पश्ट जाल्या उपरांत तांका सोडल्लें. सीसीटीव्ही फुटेज तपासतना शिंदे आनी नवीन फातोडेर सुमार तीन वराचेंर बसस्टॅण्डाचे वटेन वतना दिसले. त्या फुटेजांत दिसल्ल्या दुबाविताचेर पुलिसांनी नदर दवोरून सोमाराक सकाळी तांका धरलें. ताणे आपलो गुन्यांव मानून घेतगीर ताका अटक केली.
पुलीस अधिक्षक निधीन वाल्सन, उपअधिक्षक जिवबा दळवी, निरीक्षक परेश नायक हांच्या मार्गदर्शना खाला उपनिरीक्षक सुनील पाटील, विराज कोरगांवकार, बाबलो परब, हवालदार सुशांत चोपडेकार, पुलीस प्रकाश पोळेकार, आनंद राठोड, अक्षय पाटील, राजेश कांदोळकार हांच्या पंगडान खूनीक सोदून काडलो.
दुबावीत करण शिंदे हो दिसवड्याचेर काम करपी (रोकडा) कामगार. म्हापशें गांधी चौकांत रावंन तो काम सोदतालो. तो गिरी हांगा रावपाक आशिल्लो. खून जाल्लो नवीन बीके हो पर्रा हांगा टफ सेक्युरिटी कंपनीक सुरक्षा रक्षक म्हणून काम करतालो. तो सुटी घेवन नेपाळाक गेल्लो आनी ज्या दिसा खून जालो त्याच दिसा गोंयांत प रतआय़िल्लो
———————————————————————
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
