भांगरभूंय | प्रतिनिधी
मडगांव, प्रतिनिधी : गोंयच्या विंगड विंगड वाठारांतल्या रांपणकार आनी बोटकार ह्या नुस्तेंमार्यांचे विवीध प्रस्न आसात. घाउक नुस्तें मार्केटांतल्या जाग्याच्या प्रस्ना उपरांत ह्या सगळ्यांनी एक जावन नुस्तेकारांच्या प्रस्नां खातीर लढो दिवचो. ताका लागून गोंयच्या नुस्तेकारांचें फेडरेशन करपाचें थारलां. १४ ऑक्टोबराक जावपी बसकेंत हाचेर निमाणो निर्णय घेतले अशी म्हायती बाणावलेचे आमदार वेन्झी व्हिएगस हांणी दिली.
परंपरीक नुस्तकारांनी एकठांय येवपा विशीं बिरेस्तारा सकाळीं तांच्या कार्यालयांत बसका जाली. ह्या वेळार आमदार व्हिएगस हांचे वांगडा नीज गोंयच्या रांपणकारांचो एकवोटाचे अध्यक्ष सॅबी फर्नांडीस, खारवी भावांचो एकवोटाचे जुझे फर्नांडीस, ट्रॅडीशनल फिशरमन असोसिएशन ऑफ कोलवाचे अध्यक्ष थॉमस रॉड्रिग्ज, गोंयच्या रांपणकारांचो एकवोटचे आग्नेलो रॉड्रिग्ज, बायणा रांपणकार अँड फिशींग कॅनॉय ऑनर्स असोसिएशनाचे अँड्र्यू गुर्जांव आनी हेर हाजीर आशिल्ले.
बसके उपरांत आमदार व्हिएगस हांणी नुस्तेंमारीक गरजेच्यो सुविधा मेळपा खातीर एकवटाची गरज आसा, अशें सांगलें. नुस्तें सांठोवन दवरपा खातीर दर्यादेग वाठारा लागसारा कोल्ड स्टोअरेजची सुविधा, मार्केटांत नितळसाण, नुस्तेंमारी खातीर नव्या येवजण्यांची गरज आसा. नुस्तें सुकोवपा खातीर आनीक प्लॅटफाॅर्म उपलब्ध करपाची गरज आसा. इंधन आनी ताचेर मेळपी अनुदान रोखडेंच मेळपाक जाय. कांय आडखळी आयल्यार एकवटान लढो दिवप, नुस्तें विकपी सुवातांचेर नितळसाण घरांची गरज आसा. ह्यो सगळ्यो गजाली बेगीन जावचे खातीर सगळ्या नुस्तेंमार्यांनी एकठांय येवचें. ताका लागून गोंयच्या नुस्तेंकारांचें फेडरेशन स्थापन करतले. १४ ऑक्टोबराक सांजेवेळार ४ वरांचेर विवीध संस्थांचे, असोसिएशनाचे अध्यक्ष आनी भांडारी हाजीर रावचे. ह्या वेळार तांकां एकठांय येवपाची कित्याक गरज आसा हें पटोवन दितले, अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
