निलंबीत मुख्याध्यापकाक सेवेंत घेवचो

भांगरभूंय | प्रतिनिधी

खंडपिठाचो वाळपय युनिटी हायस्कूल वेवस्थापनाक आदेश

वाळपय: निलंबीत केल्लो मुख्याध्यापक अश्रफ अली खान हांकां परतून सेवेंत घेवपाचो आदेश उच्च न्यायालयान वाळपयच्या युनिटी हायस्कुलाच्या वेवस्थापनाक दिला. तशेंच एका सप्तकांत तांचो पगार आनी हेर थकबाकी तांकां दिवपाक सांगलां.
खान हांणी निलंबन रद्द करपा खातीर उच्च न्यायालयांत दाद मागिल्ली. तशेंच पगारूय दिवपाक सांगिल्लें. ताचेर सुनावणी करतना निलंबनाचो आदेश काडचे पयलीं शिक्षण खात्याच्या संचालकाची मान्यताय घेवंक नाशिल्ली. कायद्या प्रमाण तशी मान्यताय घेवप बंधनकारक आसून ती घेनासतनाच निलंबन केल्ल्याचें निरिक्षण न्यायालयान नोंद केलां.
मुख्याध्यपकाक निलंबीत करपाचो प्रस्ताव वेवस्थापनान शिक्षण खात्याच्या संचालकाक धाडचो आनी ताचेर चार सप्तकांत खात्यान निर्णय घेवचो अशें न्यायालयान सुचीत केलां. खान हांकां थाकाय दिवपी निकाल दिवन तांकां ताकतिकेन त्याच पदार रुजू करचो असो निर्देश ह्या  प्रकरणांत न्यायालयान दिला.
गोंय शालेय शिक्षण कायदो 1984 कलम 11 (3) प्रमाण मुख्याध्यापकाक निलंबीत करचे पयलीं शिक्षण खात्याची शाळा मान्यताय घेवप गरजेची आसा. पूण ह्या प्रकरणांत मान्याताये बगर आदेश जारी केल्ल्याचें न्यायालयान नदरेक हाडलें आनी खान हांकां अंतरीम थाकाय मेळ्ळी.
वाळपय युनिटी विद्यालयाच्या वेवस्थापनाचो वाद फाटल्या कांय  वर्सां सावन खूबशे फावटी वयर सरतना दिसून येतालो. हाचे पयलीं ह्या विद्यालयांत खूबशा पांवड्यार शिक्षक आनी वेवस्थापन हांचे मदीं खटके उडटाले. वेवस्थापनाचो भाग आशिल्ल्या खूबशा वांगड्यांनी ह्या विद्यालयाच्या वेवस्थापनाचो ताबो आपल्या हातांत घेवपा खातीर यत्न केल्ले. ह्याच प्रयत्नांतल्यान मुख्याध्यापक खान हांकां बळीचो बोकडो करपाचें थारायिल्लें. शिक्षण खात्याची परवानगी घेवचे पयलींच तांकां निलंबीत करपाचो आदेश वेवस्थापनान दिल्लो. ह्या वेळार मुख्याध्यापकान वेवस्थापनाक हे विशीं खूबशे फावटी विनंती करून हो आदेश फाटीं घेवचो अशी विनंती केली. पूण हे विनंतीक मान दिनासतना निलंबन कायम दवरिल्लें.
निमाणें खान हांणी हे विशीं गोंय उच्च न्यायालयाच्या खंडपिठांत याचिका दाखल करून दाद मागिल्ली. खंडपिठान ह्या संदर्भाची गंभीर दखल घेवन तांचे निलंबन फाटीं घेवचें आनी आशिल्ली थकबाकी ताकतिकेन दिवची असो निर्देश दिला.
मजगतीं, वेवस्थापन आनी शिक्षक हांचे मजगतीं, सुरू आशिल्ल्या वादाक लागून विद्यालयाच्या एकूण प्रतिमेचेर परिणाम जातना दिसतात. हे विशीं खूबशे फावटी पालकांनी निरशेणी उक्तावन अशे तरेचे वाद सुरू आसल्यार भुरग्यांक शाळेंत धाडचे नात असो निर्णय घेतिल्लो. पूण खूबशे फावटी मध्यस्ती करून पालकांची समजूत काडपाचो यत्न खूबशा जाणां कडल्यान जाल्लो.
सद्या तरी वेवस्थापनाचो ताबो मेळोवपा खातीर खूबशा पांवड्यार संघर्श सुरू आसात. वेवस्थापनाच्या कांय वांगड्यांनी हे विशीं न्यायालयांत गेल्ले. वेवस्थापनाचो वाद अशे तरेन सुरू उरत जाल्यार ताचो विपरीत परिणाम विद्यालयाच्या प्रतिमेचेर जावन पटसंख्येचेर ताचे पडसाद दिसूंक शकतात अशे तरेची प्रतिक्रिया खूबशा पालकांनी उक्तायिल्ली.