भांगरभूंय | प्रतिनिधी
वाडेंच्या लोकांक मंत्री सुभाष शिरोडकार हांचें आवाहन
वास्को: काल (बिरेस्तारा) एके कार्यावळींत आयिल्ले उदका स्रोत मंत्री सुभाष शिरोडकार हांचे मुखार वाडेंच्या थळाव्या लोकांनी आपल्यो समस्या मांडिल्ल्यान मंत्री सुभाष शिरोडकार चलत वचून पुराय वाठारांतले नाले, गटारां तशेंच पडझड जाल्ल्या घरांची पळोवणी केली. थंयच्या नाल्यांतलो कोयर उसपितले. पूण नालो परतून कोयरान भरचो न्हय हे खातीर थळाव्या लोकांनी सादूर रावचें अशें तांणी आवाहन केलें.
गोवा शिपयार्डाचे फाटले वटेन आशिल्ल्या दोंगराच्या मुळसांत राखणे वणत बांदप, तशेंच दोंगरा वयलीं पालसणां कोसळची न्हय हे खातीर घटाय हाडप ह्या कामांचो शुभारंभ करपा खातीर मंत्री शिरोडकार आयिल्ले.
तांचे सयत वास्कोचे आमदार कृष्णा साळकार, आदले नगराध्यक्ष नंदादीप रावत बी हाजीर आशिल्ले. ह्या वेळार थळाव्या लोकांनी मंत्री शिरोडकार हांची भेट घेवन आपल्या वाठारांतलो कोयर, गटारां, नाल्या संबंदीचे प्रस्न तांचे मुखार मांडले. ताका लागून थंय जळारां वाडिल्ल्यान व्हड प्रमाणांत त्रास सोंसचो पडत आशिल्ल्याचें सांगलें. ताका लागून मंत्र्यांनी लोकां सयत चलत वचून सगल्या वाठाराची पळोवणी केली.
ह्या वेळार तांणी उदका स्रोत खात्याच्या अधिकाऱ्यांक कांय निर्देश दिले. नाल्यांतलो कोयर उसपितले. पूण तातूंत परतून कोयर, प्लास्टीक पोतयो उडोवन घाण करची न्हय. ताची योग्य ती देखभाल करची, कोयर कोण उडयता हाचेर तरणाट्यांनी लक्ष दवरचे. नाजाल्यार थंय सीसीटीव्ही कॅमेऱ्यांची सोय करची अशें मंत्री शिरोडकार हांणी सांगलें.
कृष्णा साळकारान सांगलें की, फाटल्या वर्सा हो नालो पुरायपणान नितळ केल्लो. पूण ह्या नाल्यांत कोणतरी मुद्दाम कितेंय तरी उडोवन उदकाची वाट आडायतात. हे संबंदी थळाव्यांनी दक्ष रावपाची गरज आसा. ती वाट कोण आडायता हें सोदून काडात. आमी नालो नितळ करूं. पूण तो नितळ दवरपाची जापसालदारकी तुमची आसा अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
