भांगरभूंय | प्रतिनिधी
काणकोण: नगर्से-चाररस्त्या सावन राष्ट्रीय म्हामार्ग 66 गेला. नगर्से सावन हो मार्ग शेतांतल्यान गेला. ह्या रस्त्याक गोंयचे आदले मुख्यमंत्री सर्गेस्त मनोहर पर्रीकार अशें नांव दिलां. हो रस्तो बांदतना रस्त्याचे सकयले सुवातेर भुंयारी मार्ग दवरला. दर दोन वर्सांनी श्रीस्थळ काणकोणच्या मल्लिकार्जून देवाचो विरमेळ रातच्या वेळार हांगा सावन वता. विरमेळा खातीर हो भुंयारी रस्तो दवरला. पूण सद्या हो भुंयारी मार्ग सोरो पियेवप्यांचो अड्डो जावपा बरोबरूच हेडग्या गोरवांचें आश्रयस्थान जालां.
ह्या भुंयारी रस्त्या शेजराच खाटयार हांगासरल्या वीज स्टेशना कडल्यान चावडी वचपा खातीर आनी तशेंच मुखेल रस्त्यार वचपा खातीर बगल मार्ग तयार केला. ह्या बगल मार्गानूय व्हड प्रमाणांत मडगांव सावन येवपी वाहनां धांवत आसतात. ह्या भुंयारी मार्गांतल्यान गोरवां धांवत येत आसतात. ते खातीर ह्या बगल मार्गान प्रवास करपी दुचाकी आनी चारचाकी वाहनांक अपघात जावपाची शक्यताय आसा.
ह्या भुंयारी मार्गाच्या दोनूय वटांनी गेट बसयल्यार ह्या मार्गान गोरवां येवपाचीं बंद जातली. नाजाल्यार हांगा अपघात जावपाची शक्यताय आसा अशें काणकोण पालिकेचे आदले उपनगराध्यक्ष दिलीप केंकरे हांणी सांगलें. संबंदितांनी हांगासरली गंभीरताय वळखून हांगा गेट बसोवची अशी केंकरे हांणी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
