भांगरभूंय | प्रतिनिधी
उदका स्रोत खातें, मुरगांव पालिका हांणी केल्ली आडनदर
वास्को: सासमोळें बायणा हांगासरल्या बायणा यूथ रिक्रिएशन क्लबा कुशीच्या नाल्यांतलो गाळ उपसा करपा खातीर उदका स्रोत खात्यान, मुरगांव पालिकेन आडनदर केल्ल्यान नगरसेवक नारायण (दिलीप) बोरकार हांणी स्वताच्या खर्चान सुमार 400 मिटर मेरेनच्या नाल्याची नितळसाण केली. हे खातीर तांकां 10 हजार रुपया परस चड खर्च करचाे पडलो. थळाव्या लोकांनी तांच्या ह्या कामाची तोखणाय केल्या.
ह्या नाल्यांतलो गाळ फाटलीं 10 ते 12 वर्सा उसपूंक नाशिल्ल्यान नालो गाळान पूर्णपणान भरिल्लो. तातूंतच कांय जाणांनी आपले घाण उदक सोडिल्ल्यान घाण पातळिल्ली. ह्या नाल्यांतलो गाळ उसपुचो हे खातीर थळावे लोक सेगीत विनंती करताले. पूण उदका स्रोत, मुरगांव पालिका हांचे कडल्यान गाळ उपसा करपा संबंदीची कसलीच हालचाल करूंक नाशिल्ली.
ह्या प्रकरणांत नगरसेवक बोरकार हांणीय यत्न केले. पूण तांकां फक्त आस्वासनां मेळटालीं. निमाणें तांणी स्वता खर्च करून गाळ उपसा करपाचो निर्णय घेतलो. ते प्रमाण फाटल्या चार दिसां मदीं गाळ उसपिलो. ताका लागून नालो नितळ जालो. तेच बरोबर पावसाच्या उदकाचो निचरो योग्य रितीन जातलो हे खातीर थळाव्यांनी समाधान उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
