भांगरभूंय | प्रतिनिधी
मशिनांच्या आवाजान थळाव्यांची खळटा न्हीद
फोंडें: धारबांदोडें म्हालांत फाटल्या कांय म्हयन्यां सावन बेकायदो चिऱ्या खणीचे संख्येंत सुमारा भायर वाड जाल्ल्याचें दिसून येता. खनीज वेवसाय सुरू जावपाची शक्यताय नाशिल्ल्यान खूबशा जाणांनी बेकायादे चिऱ्या खणी कडेन लक्ष दिलां. चिऱ्या खणी वेल्या मशिनाच्या आवाजान थळाव्या लोकांची न्हीद खळ्ळ्या. संबंदीत अधिकाऱ्या कडेन कागाळी करून लेगीत कारवाय जायत नाशिल्ल्यान वाठारांत तिडकीचें ल्हार पातळ्ळां.
धारबांदोडें म्हालांतल्या किर्लपाल-दाभाळ पंचायत वाठारांत व्हड प्रमाणांत बेकायदो चिऱ्या खणी सुरू आसात. हातूंत भांडोळें गांवच्या वाठारांत 5-6 चिऱ्या खणी कार्यरत आसात. चिऱ्या खणीचेर व्हड प्रमाणांत मशिनाचो वापर जायत आसून मशिनाच्या आवाजाचो परिणाम थळाव्या लोकांचेर जायत आसा. तेच प्रमाण सावरगाळ आनी करमणें वाठारांत चिऱ्या खणी बेकायदो सुरू केल्यात. तशेंच कुळें, मोलें, सांकड्डें, सांवड्डें आनी कालें पंचायत वाठारांत व्हड प्रमाणांत चिऱ्या खणी सुरू जाल्यात.
म्हालांतल्या सगल्या पंचायत वाठारांत बेकायदो चिऱ्या खणी वाडिल्ल्यो आसल्यो तरी सरकारी अधिकारी मात कारवाय करपाक अपेशी थारल्यात. थळाव्या लोकांच्या मतान अधिकाऱ्यां कडेन कागाळी दिवन लेगीत चिऱ्या खणीचेर कारवाय जायना. थातोड-धारबांदोड्यां सरकारी मुळावे शाळेच्या कांय अंतराचेर एक मोटी चिऱ्या खण परतून सुरू केल्या. सुमार 6 म्हयन्यां पयलीं त्या चिऱ्या खणीचेर खात्याच्या अधिकाऱ्यांनी धाड घालून कारवाय केल्ली. त्या वेळार चिऱ्या खण धनयान खाण खात्याच्या अधिकाऱ्यांक गाळी संवले उपरांत धनया सयत वट्ट चार जाणांक अटक केल्ली. पूण परतून चिऱ्या खण सुरू जाल्ल्यान लोकांनी तिडक उक्तायल्या.
म्हालांत बेकायदो सुरू केल्ल्या चिऱ्या खण धनयांनी एक संघटणा स्थापन केल्या. संघटणेचे सगल्या पदाधिकाऱ्यांनी आपआपल्या वाठारांत वेव्हार सुरळीतपणान सुरू केला. ही संघटणा लेगीत बेकायदो आसून फुडारांत चिऱ्या खण वेवसायांतल्यान व्हड प्रमाणांत गुन्यांव वाडपाची शक्यताय उक्तायतात.
सांवड्ड्या रेंव काडटा आसतना खुना सारके व्हड गुन्यांव घडिल्ल्यान चिऱ्या खण वेवसाय लेगीत तेच दिशेन वचपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
