भांगरभूंय | प्रतिनिधी
कांय शाळांनी 3 ते 5 विद्यार्थी घेतात शिक्षण ; खाजगी शाळां कडेन पालकांचो ओडो
फोंडें: धारबांदोडें म्हालांतल्या सांकड्डें पंचायत वाठारांत उधळशें आनी पानसवाडो गांवांतल्या दोन सरकारी मुळाव्या शाळांनी विद्यार्थी नाशिल्ल्यान शाळा बंद जावपाचे वाटेर आसात. पंचायत वाठारांत फाटल्या कांय वर्सां सावन सरकारी मुळावी शाळा बंद जावप सुरूच आशिल्ल्याचें दिसून येता. जाल्यार कुळें पंचायत वाठारांतल्या माटोजे, वाकीकुळण आनी वेळीपवाडो हांगासरल्या सरकारी मुळाव्या शाळांनी दरेकी 3 विद्यार्थ्यांचो आस्पाव आसा. हाका लागून धारबांदोडें म्हालांत कितल्योशोच शाळा फुडल्या कांय दिसांनी कायमच्यो बंद जावपाच्या मार्गार आसात.
सांकोड्डें पंचायत वाठारांतल्या उधळशें सरकारी मुळावे शाळेंत विद्यार्थी नाशिल्ल्यान शाळा बंद जावपाचे वाटेर आसात. पूण आदले विद्यार्थी तशेंच हेर शिक्षीत ग्रामस्थ शाळा सुरू दवरपा खातीर धडपड करीत आसात. शाळेंत पोरूं वर्सा एकूच विद्यार्थी चौथीच्या वर्गांत शिकतालो. ह्या वर्सा एके चलयेक प्रवेश घेवपा खातीर पालकांनी शिक्षिके कडेन संपर्क केल्लो. पूण तें चली आपल्या मूळ गांवांत गेल्ल्यान पयल्या दिसा हजर रावंक शकली ना. तशेंच गांवांत आनीक दोन गोंया भायलीं भुरगीं भाड्याचे कुडींनी रावपा खातीर आयिल्ल्यान तांकां विद्यालयांत प्रवेश दिवपाचो यत्न जायत आसा. पूण तिनूय भुरग्यांच्या पालकांनी शाळेंत प्रवेश घेवपाक न्हयकार दिल्यार शाळा बंद जावपाची शक्यताय आसा.
एका वेळार पंचायत वाठारांत सगल्यांत चड विद्यार्थी उधळशें सरकारी मुळावे शाळेंत शिक्षण घेताले. पूण वाठारांत खाजगी शिक्षण संस्था सुरू जाल्ल्यान पालकांनी आपल्या भुरग्यांक त्या संस्थांनी शिक्षण घेवपा खातीर धाडून दिल्यात.
पानसवाडो-सांकोड्ड्यां दोन वर्सां पयलीं लाखांनी रुपया खर्च करून नुतनीकरण केल्ली सरकारी मुळावी शाळा ह्या वर्सा विद्यार्थी नाशिल्ल्यान बंद केली. ते शाळेंत शिक्षण दिवपी शिक्षिका 31 मे दिसा निवृत्त जाल्या. शिक्षिकेचो प्रस्न सुटिल्लो आसलो तरी गांवांतले पवित्र स्थान म्हूण वळखीची आशिल्ली शाळा बंद जावपाची आशिल्ल्यान लोक निरशेल्यात.
फाटल्या कांय वर्सा सांकड्डें पंचायत वाठारांत खूबशो सरकारी मुळाव्यो शाळा बंद केल्यात. हातूंत डोंगरवाडो, मुरगें आनी धारगें गांवांतल्या शाळांचो आस्पाव आसा. ह्या वर्सा कुळें पंचायत वाठारांत वेळीपवाडो, वाकीकुळण आनी माटोजे हांगासरल्या शाळांनी दरेकी तीन विद्यार्थी शिक्षण घेतात. जाल्यार किर्लपाल पंचायत वाठारांतल्या कळसय आनी सातोण सरकारी मुळावे शाळेंत दरेकी पांच विद्यार्थी आसात.
धारबांदोडें म्हालाचे भाग शिक्षण अधिकारी सीताराम नायक हांणी पानसवाड्या वयली सरकारी मुळावी शाळा विद्यार्थी नाशिल्ल्यान बंद दवरिल्ल्याचें सांगलें.
मजगतीं, धारबांदांडें म्हालाची निर्मिती जावन कितलींशींच वर्सा जालीं. तरिपूण अजून भाग शिक्षण अधिकाऱ्यांक गरजेच्यो सुविधा उपलब्ध करून दिल्ल्यो दिसून येनात. उण्या कर्मचाऱ्यांक लागून कचेरेंतलीं सगलीं कामां तशेंच सरकारी वाहन नाशिल्ल्यान खाजगी वाहनांचो वापर भाग शिक्षण अधिकाऱ्यांक करचो पडत आशिल्ल्याचें दिसून येता. निवृत्त जाल्ल्या भाग शिक्षण अधिकाऱ्यांनी ह्यो सुविधा उपलब्ध करून दिवपाचे मागणेची दखल अजून मेरेन शिक्षण खात्यान घेवंक नाशिल्ल्यान पालकांनी तिडक उक्तायल्या.
शिक्षण खात्या वतीन फाटल्या कांय वर्सां सावन सरकारी मुळाव्या शाळांनी विद्यार्थ्यांची पटसंख्या वाडोवपा खातीर यत्न जायत नाशिल्ल्याचें दिसून येता. हातूंत फाटल्या कांय वर्सां सावन पटसंख्या नाशिल्ल्या विद्यालयांच्या इमारतींचें लाखांनी रुपया नुतनीकरणा खातीर खर्च केले. गांवगिऱ्या वाठारांतले पालक आपल्या भुरग्यांक खाजगी शिक्षण दिवपा खातीरच्या यत्नांत आसात. ह्या वर्सा सरकाराचे योग्य नियोजन नाशिल्ल्यान सरकारी मुळावी शाळा बंद जातना दिसून येता. नुतनीकरण केल्ल्यो शाळा फुडारांत खूबशा गांवांनी सोबेच्यो वास्तू तशेंच इतिहासीक वास्तू म्हूण उबी रावंक शकतात अशी चर्चा गांवगिऱ्या वाठारांनी सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
