भांगरभूंय | प्रतिनिधी
पेडणें, प्रतिनिधी ः धारगळें दोन खांब ते आरोबा मेरेनच्या रस्त्याचे कोट्यांनी रुपया खर्च करुन सोबीतकाय केल्ल्या प्रकल्पांत दिसानदीस कोयराचें प्रमाण वाडत आसा. थळावे पंचायतीन आनी सरकारान हाचे कडेन पुरायपणान दुर्लक्ष केल्ल्यान भलायकीची समस्या निर्माण जाल्या. हे बाबतींत योग्य उपाय करचे अशी मागणी सीताराम परब हांणी केल्या.
स्वदेश दर्शन येवजणे खाला गोंय पर्यटन म्हामंडळान दोन खांब ते आरोबा मेरेनचो रस्तो सोबीत करपा खातीर कोटी रुपया खर्च केले. हो प्रकल्प कशे तरेन बांदलो, त्या प्रकल्पाचेर कितलो खर्च जाला, कंत्राटदारान वायट दर्जाचें काम कशें केलां आनी सध्याची परिस्थिती कशी आसा हाचेर सरकारान एक नदर मारची. ताचेर उपाय येवजण करपाची गरज आसा, अशें तांणी सांगलें.
गांवचो कोयर निवळ करपाचे काम थळावी पंचायत करतात. हे खातीर सरकारा कडल्यान खाशेलो निधी मेळटा. पूण धारगळ पंचायतीक ह्या कोयराचो कसो विलो लावचो तें कळना असो प्रस्न नागरीक उक्तावपाक लागलां. धारगळ सरपंचान आतां तरी ह्या कोयराचेर लक्ष दिवन ह्या वाठारांत कोयर उडोवपी लोकांचेर खर कारवाय करची अशी मागणी सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
