भांगरभूंय | प्रतिनिधी
जामीन अट सदळ करून 20 दिसांची मेकळीक; ‘ऑनलायन पोकर गेमींग’ प्रकरण
पणजी: पर्वरी पुलिसांनी जानेवारी 2022 वर्सा पीडीए कॉलनींत चलपी ‘ऑनलायन पोकर गेमींग’ हो ऑनलायन कसिनो जुगार उजवाडा हाडिल्लो. ह्या प्रकरणांत जामिनाचेर आशिल्ल्या हरदीप सिंग आनी राहूल उर्फ अंकूर खन्ना ह्या दोगांक मूळ गांवांत वचपा खातीर मुंबय उच्च न्यायालयाच्या गोंय खंडपिठान 20 दिसांची मेकळीक दिवन जामीन अट सदळ केल्या.
ह्या प्रकरणांत पर्वरी पुलिसांनी 22 जानेवारी 2022 दिसा पर्वरेंतल्या पीडीए कॉलनींतल्या बेकायदो रितीन ‘ऑनलायन पोकर गेमींग’ कसिनो सुरू आशिल्ल्या घराचेर धाड घालून तिगां दुबावितांक अटक केल्ली. तांचे कडल्यान जुगारा खातीर वापरिल्ले 6 मोबायल, चार लॅपटॉप, आयपॅड, संगणक डेस्कटॉप, गेमींग चिप्स आनी 5 लाख 50 हजार रुपयांची रोख तशेंच हेर मुद्देम्हाल जप्त केल्लो.
पुलिसांनी ह्या दुबावितां आड गुन्यांव दाखल केला. हातूंत मोटें रॅकेट आशिल्ल्याचें मुखार आयले उपरांत ईडीन वयल्या दुबावितांची चवकशी केली. उपरांत ईडीन 28 जानेवारी 2022 दिसा मनी लाँड्रींग प्रतिबंधक कायद्या खाला गुन्यांव दाखल करून तपास सुरू केलो आनी अटक केल्ल्या तिगां दुबावितांची चवकशी केली.
‘ऑनलायन पोकर गेमींग’ कसिनो चलयत आशिल्ल्याचें मुखार आयले उपरांत ईडीन 6 एप्रील 2022 दिसा क्लबाचो मुखेली तशेंच दुबावीत हरदीप सिंग आनी राहूल खान्ना हांच्या कोलकाता हांगासरल्या घरांचेर धाडी घालून म्हत्वाचे दस्तावेज जप्त करून त्या दोगांक अटक केल्ली.
अटक केल्ल्या मुखेल दुबावितांक म्हापशेंच्या उत्तर गोंय जिल्हो आनी सत्र न्यायालयांत दाखल केल्लो जामीन अर्ज भायरायिल्लो. त्या निवाड्याक दुबावितांनी मुंबय उच्च न्यायालयाच्या गोंय खंडपिठांत दिल्लें आव्हान भायरायलें.
मजगतीं, ह्या प्रकरणांत ईडीन पणजेंतल्या उत्तर गोंय जिल्हो आनी सत्र न्यायालयांत वयल्या दोगां दुबावितां आड आरोपपत्र दाखल केलां. तशेंच मूळ प्रकरणांत गुन्यांव फांट्यान फटवणूक आनी म्हायती आनी तंत्रज्ञान कायद्याचें कलम रद्द करून आरोपपत्र दाखल केलें. हाची दखल घेवन वयल्या दुबावितांक खंडपिठांत अर्ज करून जामिनार सुटका करपाची मागणी केली. हाची दखल घेवन खंडपिठान दुबावीत हरदीप सिंग आनी राहूल खन्ना ह्या दोगांक 1 लाख रुपया, म्हयन्याच्या दर 1 आनी 15 तारखेक ईडी कचेरेंत हजेरी लावपाचो तशेंच गोंया भायर वच्चें न्हय आनी हेर अटीचेर सशर्त जामीन मंजूर केल्लो.
मजगतीं, दुबावीत हरदीप सिंग आनी राहूल खन्ना ह्या दोगांनी खंडपिठांत अर्ज दाखल करून वयल्यो अटी सदळ करून मूळ गांवांत वचपाची परवानगी मागली. हाची दखल घेवन खंडपिठान वयल्या दोगां दुबावितांक 3 एप्रील ते 12 एप्रील आनी 3 मे ते 12 मे मजगतीं, मूळ गांवांत कोलकात्याक वचपाक मेकळीक दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
