भांगरभूंय | प्रतिनिधी
फोंडें, प्रतिनिधी: सैन्यांत व्हडा प्रमाणांत युवकां खातीर संद उपलब्ध आसून लेगीत गोंयचे तरणाटे ताचो लाव घेनात. गोंयचे तरणाटे उच्च शिक्षण घेवन नोकरी आनी वेवसाया फाटल्यान लागल्यात. देशाच्या पर्जळीत फुडारा खातीर गोंयकार तरणाट्यांनी सैन्यांत भरती जावप गरजेचें अशें उदकास्रोत मंत्री सुभाष शिरोडकार हांणी सांगलें.
फोंडेंच्या राजीव गांधी कला मंदीर सभाघरांत कुशळटाय उदरगत संचालनालय, सार्थक फाउंडेशनाचे आनी ३ एमटीआर हांच्या जोड पालवान आयोजीत लष्करी सेवेंतल्यो रोजगारांच्यो संदी आनी उपक्रमां विशीं करियर मार्गदर्शन कार्यावळींत मंत्री शिरोडकार उलयताले. ह्या वेळार आदले खासदार नरेंद्र सावयकार, संचालक सखाराम एस. गांवकार, मेजर दिवाकर, उपसंचालक विनायक कांबळी, सार्थक फावंडेशनाचे अध्यक्ष अफझल मुल्ला, सचीव गोविंद चिमुलकार, सुदेश नार्वेकार आनी जॉन सिल्वरा हाजीर आशिल्ले.
तरणाट्यांक संस्काराच्या वातावरणांत तंत्रज्ञानाचें शिक्षण घेवपाची गरज आसा. सैन्यांत उपलब्ध आशिल्ल्या संदीचो लाव घेवपाचो यत्न गोंयच्या तरणाट्यांनी करचो अशें फुडें मंत्री शिरोडकार हांणी सांगलें.
गोंयच्या तरणाट्यांक सैन्यांत भरती करपा खातीर जागृतायेची गरज आसा अशें सावयकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
