भांगरभूंय | प्रतिनिधी
पणजी : देखो अपना देश येवजणे खाला गोंय सरकार आयज डेहराडून हांगा उत्तराखंडा कडेन समजिकायेची कबलात करता. हे कबलाती खाला गोंय – डेहराडून मजगतीं थेट विमान सेवा सुरू जावपा सयत हेर पर्यटन कार्यावळी सुरू जातल्यो. पर्यटन मंत्री रोहन खंवटे हांणी ही म्हायती दिली.
पर्यटन मंत्री रोहन खंवटे हांच्या फुडारपणा खाला सोमारा पर्यटन मंडळाची बसका जाली. बसके उपरांत पत्रकार परिशदेंत मंत्री खंवटे हांणी ही म्हायती दिली.
आमचो देश देवळां, उद्यानां तशेंच पर्यटन थळांनी नटला. देशांतल्या भोवसंख्य लोकांनी देशांतलें पर्यटन तशेंच सैमीक थळां पळोवंक ना. सामान्य लोकांनी देश पळोवचो म्हूण देखो अपना देश येवजणेची कार्यवाही जातली. प्रधानमंत्री नरेंद्र मोदी हांचे कल्पनेंतल्यान ही संकल्पना तयार जाल्या. देखो अपना देश येवजणेचो भाग म्हूण गोंय सरकार आयज उत्तराखंडा कडेन समजिकायेची कबलात करता. गोंयचो पंगड आयज डेहराडून हांगा भेट दिवन कबलात करतलो. हे कबलाती खाला गोंय – डेहराडून मजगतीं थेट विमान सेवा सुरू जातली. उत्तराखंडांत खूबशीं पर्यटन थळां आसात. हाचो लेगीत आस्पाव कबलातींत जातलो. गोंय आनी उत्तराखंड मजगतीं पर्यटन कार्यावळी वा पर्यटन भागिदारी सुरू जावची म्हूण ही कबलात जातली अशें खंवटे हांणी सांगलें.
डेहराडून उपरांत अमृतसर, गुवाहाटी, नागपूर, नाशीक, काशी, वाराणसी ह्या शारांनी त्या, त्या राज्य सरकारां कडेन कबलाती जातल्यो.
गोंयची वळख उत्तर काशी अशी आसा. हे वळखीचो पर्यटन वाडचे म्हूण उपेग जातलो. स्वदेश दर्शन येवजणे खाला कोलव्यां आनी पर्वरे सर्कीट तयार जातलें. प्रसाद येवजणे खाला पोरणें गोंय चर्च वाठार विकसीत करपाक मान्यताय मेळ्ळ्या. राज्यांत जी पर्यटन म्हायती केंद्रां आसात तातूंत चेंजींग रूम, वॉश रूम ह्यो सुविधा तयार जातल्यो. पर्यटनांत मुळाव्यो सुविधा तयार करपाची कामां व्हड प्रमाणात जातली अशें रोहन खंवटे हांणी म्हणलें.
पर्यटन आराखड्याचो फेरनियाळ
केपीएमजी एजन्सीन पर्यटन आराखडो (मास्टर प्लॅन) तयार केला. ह्या आराखड्यांत बदल जावपाची गरज आसा. ह्या आराखड्याचो फेरनियाळ घेवपाचे आदेश सरकारान केपीएमजीक दिल्यात. कोवीड म्हामारी उपरांत पर्यटनांत बदल जाला. हें प्रमाण आराखड्यांत बदल जावपाची गरज आसा अशें पर्यटन मंत्री रोहन खंवटे हांणी सांगलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
