भांगरभूंय | प्रतिनिधी
दिवचल, प्रतिनिधी: पडींग जमीन लागवडी खाला हाडल्यार गोंयचें शेतकी आनी पशू संवर्धन वाठार स्वयंपूर्ण करपाक मजत जातली. ताका लागून दिवचल म्हालांतल्या १२५० हेक्टर पडींग जमनीचेर लागवड करपाचो उलो मुख्यमंत्री डॉ. प्रमोद सावंत हांणी मारलो.
सांखळेच्या सरकारी म्हाविद्यालयांत ‘बिचोलीम प्रोग्रेसिव्ह फार्मर प्रोड्युसर कंपनी’ वतीन बसका आयोजीत केल्ली. ह्या वेळार मुख्यमंत्री उलयताले.
पयलो दिवचल म्हालांत हो प्रयोग येसस्वी करून उपरांत पुराय राज्यांत तो राबयतले. सांखळे मतदारसंघांत ४५० जाल्यार मयां ५५० आनी दिवचले २५० अशी दिवचल म्हालांत वट्ट १२५० हेक्टर जमीन पडींग आसा. ह्या जाग्यार सुमार ८० टक्क्या परस चड सुवातांचेर सिंचनाची वेवस्था केल्या अशें मुख्यमंत्र्यान फुडें म्हणलें.
ह्या जाग्याचें सर्वेक्षण करून परंपरीक पिकां सयत भाजीपालो आनी उरिल्ल्या वाठारांत मको, ज्वारी, बाजरी, नेपियर हाची लागवड केल्यार शेतकी उत्पन्न वाडटलें तशेंच जनावरांच्या चार्याचोय प्रस्न सुट्टलो. सध्या कृषी म्हाला सयत जनावरां खातीर लागपी ओलें आनी सुकें शेण, कडबा, सायलेज अश्यो जायत्यो गजाली भायल्या राज्यांतल्यान येतात. ताका लागून कोट्यांनी रुपया भायर वतात. ह्यो गजाली आमच्या राज्यांत निर्माण जाल्यार नव्या रोजगारा वांगडा शेतकारांकूय फायदो जातलो. गांवच्यो सगळ्यो पडींग जमनी लागवडी खाला हाडपाचो उलो मुख्यमंत्र्यान ह्या वेळार मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
