भांगरभूंय | प्रतिनिधी
दिवचल: दिवचल भौशीक गणेश मंडळाचें समाजीक सेवा कार्य तोखणायेचें आसा. गणपतीची सेवा करतनाच समाजीक जाणीव बाळगून खूबशा मळार सेवा दीत आशिल्ल्यान, तशेंच सगले जाण संघटीत रावन कार्य करीत आशिल्ल्यान तांचे कार्य प्रेरणादायी आसा अशें मुख्यमंत्री डॉ. प्रमोद सावंत हांणी म्हणलें.
दिवचल भौशीक गणपतीचें दर्शन मुख्यमंत्री डॉ. प्रमोद सावंत हांणी घेतलें. ह्या वेळार दिवचलचे आमदार डॉ. चंद्रकांत शेट्ये, मंडळाचे अध्यक्ष दत्तगुरू आमोणकार, नरेश कडकडे, अना फळारी, प्रशांत धारगळकार आनी हेर मानेस्त हाजीर आशिल्ले.
गोंयच्या लोकांक सूख, समृद्धी मेळची आनी राज्याचो विकास घडचो हे खातीर दरेक कुटुंबाक आशिर्वाद मेळचो, गाेंयच्या लाेकांचे भलायेचो सांबाळ करचाे, कोरोनाचें दुयेंस जे परतून वयर सरपाचो यत्न करता तें पयसावचें, कसल्याय संकश्टाक सामकार वचपाची तांक गोंयकारांक दिवची अशी प्रार्थना डॉ. प्रमाेद सावंत हांणी गणपती कडेन केली.
ह्या वेळार आमदार डॉ. चंद्रकांत शेट्ये हांणीय गणपतीचें दर्शन घेवन लोकांचे भलायके खातीर प्रार्थना केली. अध्यक्ष दत्तगुरू आमोणकार हांणी तांकां येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
