भांगरभूंय | प्रतिनिधी
कावल एकठांय करपाचो करताले वेवसाय
भांगरभूंय । प्रतिनिधी
म्हापशें: देशांत बेकायदो घुसखोरी करून आयिल्ल्या आनी प्लास्टीक वस्तू एकठांय करपाच्या नांवान घराघरांनी भोंवून कावल खरेदी विक्रीचो वेवसाय करपी एका बांगलादेशी कुटुंबाक गोंय पुलिशेच्या आतंकवादी विरोधी पंगडान (एटीएस) ताब्यांत घेतला. दिवचलेच्या प्रतापनगरांत पांच वांगड्यांचें हें कुटुंब रावतालें.
बेकायदो घुसखोरी करून देशांत प्रवेश केल्लें एक बांगलादेशी कुटुंब दिवचे रावता अशी म्हायती आतंकवादी विरोधी विभागाक मेळिल्ली. ह्या विभागान बुधवारा 14 सप्टेंबराक वासपूस करून कुटुंबाचो पत्तो मेळयलो आनी ताका भाड्यान रावपी घरांतल्यान ताब्यांत घेतले.
हें कुटुंब उत्तर तपलबॉडी बागीरा जिल्हो बांगलादेशांतलें. तें 2019 त बंगळुरू मार्गान गोंयांत आयिल्लें. तेन्नाच्यान फाटलीं अडेज वर्सां तें कुटुंब दिवचले बिराडाक रावतालें. कामरून इस्लाम औलादर, भाव इलियाझ औलादर आनी घरकान्न कुर्शिया बेगम अशी ह्या बांगलादेशी घुसखोरांचीं नांवां आसात. तांकां दोन ल्हान भुरगींय आसात. ते रावतात त्या घराची धनीण जेश्ठ महिला आसा. तिका एक दिव्यांग चलो आसा.
गोंयांत आयले उपरांत ह्या कुटुंबान दिवचलेच्या प्रतापनगरांत एक कूड भाड्यान घेतली. दिवचल आनी सरभोंवतणच्या गांवांनी प्लास्टीक आयदनां घेवन त्या बदलांत कावलांतल्यो वस्तू खरेदी करप आनी उपरांत त्यो कावला अड्ड्यांत व्हरून विकपाचो वेवसाय कामरून औलादर आनी इलियास औलादर करताले. एटीएसान ह्या कुटुंबाक ताब्यांत घेतले आनी तांची खोलायेन चवकशी केली.
बिरेस्तारा ह्या घुसखोर कुटुंबाची म्हायती पुलीस खात्याच्या विदेशी नोंदणी अधिकारी विभागाक म्हायती दिली. सध्या म्हापशें स्थानबद्धता केंद्रांत सुवात नाशिल्ल्यान ह्या कुटुंबाक तें रावता त्या बिराडांतूच नदरकैदेंत दवरला. दिवचल पुलिशेचो त्या बिराडाचेर बंदोबस्त आसा. आतंकवाद विरोधी पंगड विभागाचे पुलीस उपअधिक्षक राजन निगळ्ये हांच्या मार्गदर्शना खाला निरिक्षक विलेश दुर्भाटकार हांच्या फुडारपणा खाला पंगडान ही कारवाय केली.
सोपस्कर पुराय जाय मेरेन नदरकैदेंतूच
ताब्यांत घेतिल्ल्या बांगलादेशी कुटुंबाक परतून तांच्या मायदेशांत धाडपाची जापसालदारकी विदेशी नोंदणी अधिकारी विभागाची आसा. विभागा वतीन बांगलादेश दूतावासा कडेन संपर्क सादला. मायदेशांत धाडपाचे सगळे सोपस्कार पुराय जाय मेरेन तें नदरकैदेंत आसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
