भांगरभूंय | प्रतिनिधी
दिवचल, प्रतिनिधी : दिवचलच्या मार्केटांत कांय दिसां पयलीं लागिल्ल्या उज्यांत सुमार सवाय कोटी रुपयांचें लुकसाण जाल्लें. बाजारांत दुकानां भायर अतिक्रमणाक लागून उजो पालोवपी दळाचें ते सुवातेर पावप कठीण जाल्लें. तशेंच कळावूय जाल्लो. हांगा आशिल्लीं प्लास्टीक कव्हरां, दुकाना भायर केल्लें अतिक्रमण… हाका लागून तीं थंयच्यान बेगीन काडचीं तशेंच रस्ते वाहनां खातीर मेकळे करचे, अशी मागणी हांगा जाताली.
आयज नगराध्यक्ष कुंदन फळारी तशेंच बाजार निरीक्षक गजानन परवार हांणी मार्केटांत भोंवून अतिक्रमण बेगीन काडपाच्यो सुचवण्यो दिल्यो. उपरांत दुकानदार, गाडेकारांनी सहकार्य करून सगळें अतिक्रमण पयस केलें. ह्या वेळार हांगा व्हडली गाडी हाडून तांणी जाग्याचो अदमासूय घेतलो.
बाजारांत उजो लागपाच्यो घडणुको घडच्यो न्हय देखून सगळ्यांनी जतनाय घेवची. तशेंच बाजारांत हायड्रेन आनी हेर उजो पालोवपी सुविधा उपलब्ध करतले अशें ह्या वेळार नगराध्यक्ष फळारी हांणी सांगलें. ह्यान फुडें अतिक्रमण केल्यार, रस्त्यार दुकानां घाल्यार खर कारवाय जातली, अशें तांणी फुडें म्हणलें.
उजो लागिल्ल्यान जांकां लुकसाण सोंसचें पडलां तांकां अर्थीक मजत मेळचे खातीर आपूण यत्न करतां. ताका लागून विवीध माध्यमां वरवीं अर्ज सादर केल्यात. आपत्कालीन यंत्रणा विभाग, मुख्यमंत्री सहाय्य्य निधी आनी हेर स्वरूपांत मजत मेळचे खातीर यत्न सुरू आसात अशें आमदार डॉ. चंद्रकांत शेट्ये हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
