भांगरभूंय | प्रतिनिधी
युनायटेड टॅक्सीमॅन संघटनेची शिटकावणी
वास्को, प्रतिनिधी: दाबोळे विमानतळार बेकायदेशीर दलालांचो (टावट्स) वावर वाडला. दाबोळे विमानतळ पुलीस तांचेर कारवाय करिनाशिल्ल्यान तांची गुंडगिरी वाडतूच चल्ल्या, असो आरोप टॅक्सीकारांनी केला. मंगळारा सांजेवेळार दाबोळे विमानतळार युनायटेड टॅक्सीमॅन असोसिएशनाचे भांडारी सर्वेश गांवस आनी कार्यकारी वांगडी कृपा नायक हांकां दलालांनी बडयले. ताचे उपरांत असोसिएशनाचे पदाधिकारी आनी वांगड्यांनी दाबोळे विमानतळ पुलीस स्टेशनांत वचून बसले. ताका लागून बडोवन गेल्ल्या तीग जाणांक पुलिसांनी अटक केली.
हेरांकूय बेगीनूच अटक करची. अशें आमी परत सोंसून घेवचे ना. तेन्ना कायदो आनी सुवेवस्थेचो प्रस्न निर्माण जाल्यार हे गजालीक पुरायेन पुलिसूच जापसालदार आसतले, अशी शिटकावणी युनायटेड टॅक्सीमेन असोसिएशना वतीन दिली.
दाबोळी विमानतळार असोसिएशनाचो कावंटर आसा. हे संघटणेचे सुमार ३५० वांगडी आसात. कांय दलाल विमानतळा भायर येवपी प्रवाशांक प्रवेश दारा मुखारूच आडायतात आनी तांकां उण्या दरांत पावयता अशें सांगून भायर उबे आशिल्ले टॅक्सी कडेन हाडटात. हाका लागून त्या टॅक्सीचालकांक वेवसाय मेळटा आनी त्या दलालांक तांच्या कामाची दलाली मेळटा. तोंडा कडेन आयिल्लें गिरायक हे दलाल ओडून व्हरतात. हाचो परिणाम असोसिएशनाच्या टॅक्सीवाल्यांच्या वेवसायाचेर व्हड परिणाम जाता. ह्या दलालांच्यो टॅक्सी विमानतळा भायर उब्यो आसतात. तांचे आड येरादारी पुलीस कसलेच तरेची कारवाय करिना. हे टॅक्सींत जायते फावट गिरायकांक शेअरींग करून व्हरतात. ताका लागून गिरायकांक उणे पयशे दिवचे पडटा. पूण त्या टॅक्सीवाल्याक खूब फायदो जाता.
मंगळारा सांजेवेळार एक दलाल कांय गिरायकांक आपल्याक जाय ते टॅक्सी कडेन व्हरतना सर्वेश गांवस आनी कृपा नायक हांणी ताका हडकिलो. तेन्ना तिडकल्ल्या त्या दलालान हेर दलालांक आपोवन ह्या दोगांयकूय बडयले. हे घडणुकेची म्हायती मेळटांच संघटनेचे अध्यक्ष शैलेश आनी आदले सरचिटणीस प्रसाद प्रभुगांवकार हांचे वांगडा सुमार २००-२५० वांगडी दाबोळी विमानतळ पुलीस स्टेशनाचेर गेले. ह्या वेळार पुलीस निरीक्षकांनी त्या दलालां मदल्या तिगांक अटक केल्ल्याचें सांगलें.
ह्या मारामारीचे घडणुकेंत जांचो आस्पाव आशिल्लो त्या सगळ्यांक अटक करची. फुडाराक दाबोळे विमानतळार दलाल दिसपाक जायना. अशे तरेची घडणूक फुडाराक जावची न्हय देखून पुलिसांनी लक्ष दिवचें अशी मागणी संघटणे वतीन केल्या. हे विशीं दाबोळी विमानतळ पुलीस निरीक्षकांनी आस्वासन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
