भांगरभूंय | प्रतिनिधी
2022-23 ह्या अर्थीक वर्सांतलो आंकडो
मुरगांव: 2022-23 ह्या अर्थीक वर्सांत दाबोळी विमानतळार बरो चार्टर हंगाम आसा. ह्या अर्थीक वर्सांत दाबोळी विमानतळान सुमार 348 चार्टर उड्डाणां हाताळ्ळीं. हातूंत सुमार 83.5 लाख लोकांनी दाबोळी विमानतळाचो वापर केलो अशी म्हायती दाबोळी विमानतळ संचालक धनंजय राव हांणी दिली.
तांणी मुखार म्हणलें, दाबोळी विमानतळार फाटल्या कोवीड म्हामारीक लागून विस्कळीत पर्यटन हंगामाचे तुळेन चार्टर तशेंच नियमीत प्रवासी संख्येंत व्हड प्रमाणांत वाड जाल्या. फाटल्या वर्साचे 39 चार्टर फ्लायट्स वयल्यान ह्या पर्यटन हंगामांत चार्टर फ्लायट्साची संख्या 348 जाल्या. चार्टर्ड फ्लायटान फाटल्या वर्सा 14,000 विशम चार्टर पर्यटकाचे तुळेन 1.4 लाख आंतरराष्ट्रीय चार्टर पर्यटकांची संख्या हाडली. जाल्यार 2022-23 ह्या अर्थीक वर्सांत सुमार 83.5 लाख लोकांनी दाबोळी विमानतळाचो वापर केल्ल्याची म्हायती विमानतळ संचालक धनंजय राव हांणी दिली.
कोविडा पयलींच्या काळांत 54 लाख लोकांचे संख्येंत ही लक्षणीय वाड जाल्या. दाबोळीन कझाकस्तान (स्कॅट अॅरलायन्स), रशिया किर्गिझस्ताना सावन (एरोन नोमॅड), अझूर रशिया, तुई-यूके सावन चार्टर फ्लायट दाखल जाल्ल्याने हंगाम खूब बरो आशिल्लो अशें राव हांणी सांगलें, आनी आमकां ह्या वर्सा अदीक येरादारीची अपेक्षा आसा. कसलेच निर्बंध नाशिल्ल्यान आनीक चार्टर विमानां येतलीं अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
