भांगरभूंय | प्रतिनिधी
उदका स्रोत विभागान व्हाळांतलो गाळ उसपुपाचें काम घेतलां हातांत
वास्को: दाबोळी मतदारसंघांत मॉन्सूनपूर्व कामां व्हड नेटान सुरू आसात. उदका स्रोत विभागान मोट्या व्हाळांतलो गाळ उसपुपाचें काम हातांत घेतलां.
दाबोळी मतदारसंघांतल्या चाफेरान, मेर्सीस वाडें वाठारांतल्या मुखेल व्हाळांतलो गाळ पावसा पयलीं उसपुपाचें काम सुरू आसा. हो मुखेल व्हाळ लागींचे खाडयेक मेळटा. ह्या व्हाळांतलो गाळ उसपिलो ना जाल्यार थंय पावसाच्या दिसांनी व्हड प्रमाणांत उदक एकठांय जावन आशिकुशीच्या घरांनी घुसता. तशेंच रस्ते उदका खाला वतात.
ते खातीर ह्या व्हाळांतलो गाळ उसपुपाच्या कामाक प्राधान्य दितात. ह्या मतदारसंघांत मुरगांव पालिका आनी पंचायत वाठारांतल्या वीज वाहिन्यां वयले खांदे कापपाचें काम हातांत घेतलां.
फुडारांत चिखली पंचायत, चिकोळणें-बोगमाळो पंचायत आनी मुरगांव पालिकेंतल्या चार प्रभागांतलीं मॉन्सूनपूर्व कामां पुराय करतले. दाबोळीचे आमदार आनी पंचायत मंत्री मॉवीन गुदिन्हो मॉन्सूनपूर्व कामांचो नियाळ घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
