भांगरभूंय | प्रतिनिधी
पुरातत्व दस्तावेज डिजीटायज्ड करपाचें काम सुरू : मंत्री फळदेसाय
पणजी, प्रतिनिधी : पुरातत्व खात्याचे दस्तावेज डिजीटल स्वरूपात नाशिल्ले. लोक ते भायर व्हरताले आनी तातूंत फेरफार करताले. हाका लागून जमीन तशेच हेर गैर वेव्हार करप कांय लोकांक शक्य जालें. आतां दस्तावेज डिजीटल स्वरूपात करपाचो वावर सुरू जाला, अशे पुरातत्व मंत्री सुभाष फळदेसाय हांणी सांगलें. पणजे आयज उलयतना तांणी ही म्हायती दिली.
पुरातत्व खात्याच्या 3 कोटी कागदपत्रांचें तशेंच दस्तावेजांचें डिजीटायजेशन जातले. डिजिटायजेशन जाले उपरांत दस्तावेज वा कागदपत्रांनी फेरफार करप शक्य जावचें ना. हाचे पयली कांय लोक कागदपत्रा स्कॅन करपा खातीर भायर व्हरताले. मागीर तीं हाडून दिताले. तातूंत ल्हवूच बदल करताले. कोणाच्या लक्षात ही गजाल येवंक ना, अशे मंत्री फळदेसाय हांणी सांगलें.
मोडी लिपयेंतल्या 90 टक्के दस्तावेजांचो मराठीत अणकार करपाचो वावर पुराय जाला. पुर्तुगेज दस्तावेजांचो इंग्लीश भाशेंत अणकार करपा खातीर पॅनल तयार केला. हाचो सरकारा सयत सामान्यांक बरोच लाव जातलो, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
